Qazaqstanda qalqansha bez obyryn emdeýge arnalǵan preparat óndirisi qolǵa alyndy, dep habarlaidy "Ult aqparat" Energetika ministrliginiń baspasóz qyzmetine silteme jasap.
22 maýsymda «Iadrolyq fizika institýty» respýblikalyq memlekettik kásipornynda qalqansha bez obyryn qosa alǵanda, qalqansha bez aýrýlaryn emdeý úshin natrii iodid (131I) radiofarmpreparatynyń birinshi ónerkásiptik partiiasy jasaldy.
Bul preparat QR Densaýlyq saqtaý ministrliginde «natrii iodidi 131I, ishýge arnalǵan eritindi» ataýymen dárilik zat retinde tirkeldi.
2021 jylǵy 24 maýsymda preparat Semei qalasyndaǵy Iadrolyq meditsina jáne onkologiia ortalyǵynyń alǵashqy patsientterine jetkizildi.
Aǵzanyń patologiialyq oshaǵynda natrii iodidi (131I) radiofarmpreparatynyń tańdamaly jinalýynyń arqasynda qorshaǵan tinderdi saqtai otyryp, obyr kletkalary joiylady.
Almatydaǵy Iadrolyq fizika institýtynda radiofarmatsevtikalyq preparattar jasaý tarihy 1986 jyldan bastalady.
Dál osy jyly KSRO-da miokard infarktisin aldyn ala diagnostikalaý úshin Tallii-201 izotopy bar preparattyń alǵashqy óndirisi uiymdastyryldy.
Qazaqstan táýelsizdik alǵannan keiin adamnyń barlyq organdarynyń aýrýlaryn diagnostikalaý úshin keńinen qoldanýǵa bolatyn Tehnetsiia-99m óndirisi jolǵa qoiyldy.
Qazirgi zamanǵy densaýlyq saqtaý júiesinde bul izotoptyń úlesine barlyq radionýklidtik rásimderdiń 80%-dan astamy tiesili.
2011 jyly Iadrolyq fizika institýty tehnetsiia generatorlaryn tirkedi jáne eki apta boiy jumys isteitin jáne eldiń kez kelgen óńirine jetkizilýi múmkin yqsham tasymaldanatyn generatorlardy óndirýdi bastady.
Radionýklidtik diagnostikany qoldana otyryp, qaterli isikterdi damýdyń eń erte satysynda anyqtaýǵa bolatyndyǵyn atap ótken jón.
Bul qaterli isik aýrýynan bolatyn ólimdi azaitady jáne naýqastarda qaitalaný sanyn edáýir azaitady.
Generatordyń konstrýktsiiasyn jasaý jumysy 2014 jáne 2015 jyldary «Jyl ónertabysy», «Shapaǵat» respýblikalyq konkýrstarynda eki márte jeńiske jetti.
2018 jyly quramyna radiofarmatsevtikalyq preparattar shyǵaratyn zamanaýi keshen kiretin Almaty qalasyndaǵy Iadrolyq fizika institýty bazasynda Iadrolyq meditsina jáne biofizika ortalyǵynyń qurylysy aiaqtaldy.
Ortalyqty qurýdyń sońǵy kezeńi radiofarmpreparattar óndirisin tiisti óndiristik praktika (GMP) talaptaryna sáikestikke sertifikattaý boldy.
Institýt qyzmetkerleri bolashaqta iadrolyq meditsinanyń jańa ázirleme negizinde Qazaqstan ultynyń densaýlyǵy men ómir súrý sapasyn nyǵaitý maqsatynda radiofarmpreparattardyń keń spektrin qoldana otyryp, ártúrli aýrýlardy diagnostikalaý men emdeý úshin jańa preparattar ázirleýdi josparlap otyr.
