2019 jyldyń 1 qańtarynan Qazaqstanda jańa IT-ýniversitet jumys isteidi. Bul týraly búgin «Astana Hub» halyqaralyq IT-startaptar tehnoparkiniń jumysyn resmi iske qosý sharasynda Prezident Nursultan Nazarbaev aitty, dep habarlaidy QazAqparat tilshisi.
«Bul shara tórtinshi ónerkásiptik revoliýtsiia jaǵdaiynda Qazaqstan úshin mańyzdy ári ózekti sanalady. Elde sáikes baǵdarlama qabyldanǵan, ol jumys istep tur. Internet-zattar, jasandy intellekt, 3D-baspa tehnologiiasy, blokchein adamzat ómiriniń barlyq salasyna belsendi enýde jáne bul qarqyndy damý tendentsiiasyna tántsifrlandyrý memlekettik básekege qabilettiligin damytýdyń negizgi faktorlarynyń birine ainalyp otyr», - dedi Nursultan Nazarbaev.
Elbasynyń atap ótýinshe, elimizde tsifrlandyrý baǵytynda keshendi jumystar júrgizilip jatyr. Ótken jyly Qazaqstannyń úshinshi jańǵyrýy iske qosyldy. Qazirgi ýaqytta onyń alǵashy nátijeleri de bar.
«Azamattarymyzdyń 75 paiyzdan astamynda elektrondy densaýlyq tólqujaty bar. Mektepterdiń 90 paiyzdan astamy tsifrlyq bilim berý resýrstarymen qamtamasyz etilgen. Qarjy salasynda kedendik deklaratsiialar 100 paiyz elektrondy formatta rásimdeledi», - dedi Memleket basshysy.
QR Prezidentiniń aitýynsha, ekonomika salalarynda da tsifrlyq tehnologiialardy engizýge baǵyttalǵan keshendi jumystar júrgizilýde. Óndiris oshaqtary kezeń-kezeńimen aqyldy óndiriske kóshýde. Halyqtyń ómir sapasyn jaqsartý úshin elimizdiń iri qalalarynda smart-siti komponentteri engizilýde.
«Elordanyń túbinde 20 myń halqy bar qalashyq bar. Bul ne ekendigin kórý úshin biz ony tolyqtai «smart-siti» jasadyq. Sodan keiin Astana men Almatyda engizetin bolamyz. Elimizdiń árbir aýylyna keńjolaqty Internetti jetkizý boiynsha aýqymdy jumystar júrgizýde. 2021 jyldyńǵ sońyna qarai ol aýyldardyń 82 paiyzyn qamtityn bolady. Qazirgi ýaqytta Nazarbaev Ýniversiteti, Aqparattyq tehnologiialar parki syndy innovatsiialyq klasterler jumys istep tur. Qazir ǵana EKSPO bazasynda jańa IT-ýniversitet qurý týraly estidim. Ol kelesi jyldyń 1 qańtarynan IT-tehnologiia úshin mamandar daiyndaý baǵytynda jumys istei bastaidy. Al Nazarbaev Ýniversiteti - bul ǵylymi-zertteý ýniversiteti», - dedi Nursultan Nazarbaev.
Buǵan deiin Elbasy Nursultan Nazarbaev «Astana Hub» jumysyn resmi iske qosqanyn habarlaǵan edik.
