Qazaqstanda ipotekalyq qaryz boiynsha kepilde turǵan turǵyn úidi jeke atqarýshylyq is júrgizýden tys óndirip alýǵa tyiym salynbaq.
Bul jaiynda Májilis depýtattarynyń saýalyna QR Qarjy naryǵyn retteý jáne damytý agenttiginiń tóraǵasy Mádina Ábilqasymovanyń jaýabynda aitylǵan, dep habarlaidy QazAqparat.
«Memleket basshysy osy jylǵy 22 qyrkúiekte Úkimetke Ulttyq bankpen jáne agenttikpen birlesip, 2021 jylǵy 1 qarashaǵa deiin atqarýshylyq is júrgizý, jeke sot oryndaýshylarynyń jumysy, ekinshi deńgeidegi bankterdiń baǵalaý qyzmeti men kepildik saiasatyn retteý aiasynda qatynastardy jetildirý boiynsha zańnamalyq jáne normativtik túzetýler toptamasyn 2022 jylǵy 1 qańtardan bastap qoldanysqa engize otyryp, ázirleýdi tapsyrdy. Zańnamalyq túzetýlerdiń negizgi ázirleýshisi bolyp Qazaqstan Respýblikasynyń Ádilet ministrligi aiqyndaldy. Qazirgi ýaqytta kepil múlkin, onyń ishinde jyljymaityn múlikti satý rásimderi jyljymaityn múlik ipotekasy jáne atqarýshylyq is júrgizý týraly zańnamalyq aktilermen, sondai-aq Qazaqstan Respýblikasynyń Azamattyq kodeksimen jáne QR Azamattyq protsestik kodeksimen reglamenttelgen. Kepil múlkin ótkizýdiń qoldanystaǵy praktikasyna júrgizilgen taldaý ótkizý rásimine jáne saýda-sattyqqa qatysýshylarǵa qoiylatyn qazirgi talaptar aýktsionnyń ashyqtyǵyn jáne ótkiziletin múlikke baǵa belgileýdiń obektivtiligin qamtamasyz etpeitinin kórsetti», - dedi ol.
Onyń atap ótýinshe, osyǵan bailanysty, ázirlenetin zań jobasynyń aiasynda azamattardyń quqyqtaryn qorǵaýdy jetildirý boiynsha mynadai qosymsha is-sharalar kózdelgen:
1) múlikti kepil berýshiniń úsh ailyq merziminde óz betimen ótkizýin kepil múlkin sot arqyly jáne sottan tys ótkizý aiasynda mindetti rásim etý, ótkizý qunynyń shegin keminde 75 paiyz jáne baǵalaý kúninen 6 aidan asa ýaqyt ótpegen kepildiń baǵalaý qunynyń 100 paiyzynan artyq bolmaityndai etip belgileý;
2)atqarýshylyq is júrgizý aiasynda turǵyn úi jyljymaityn múlkin satýdy tómendetýdiń shekti ólshemin baǵalaý qunynyń 75 paiyzynan kem bolmaityndai etip belgileý;
3) kepilde turǵan jyljymaityn múlikti sot arqyly nemese sottan tys ótkizý aiasynda onyń ishinde kreditorǵa, onyń qyzmetkerlerine jáne úlestes tulǵalaryna; eger saýda-sattyqtyń ekinshi qatysýshysy onyń jaqyn týysy, zaiyby (jubaiy) bolsa jeke tulǵanyń saýda-sattyqqa qatysýyna tyiym salý;
4) ipotekalyq qaryz boiynsha kepilde turǵan turǵyn úidi jeke atqarýshylyq is júrgizýden tys kepil ustaýshylardyń nemese sot oryndaýshylarynyń ótinishteri boiynsha óndirip alý múmkindigin boldyrmaý;
5) baǵalaýshylardyń biliktiligi men jaýapkershiligine qoiylatyn talaptardy kúsheitý;
6) jeke tulǵanyń baspanasymen qamtamasyz etilgen ipotekalyq qaryzdar boiynsha kepil qunyna qatysty bereshektiń mardymsyzdyǵyn aiqyndaý shegin ulǵaitý.
«Qazaqstan Respýblikasynyń Ádilet ministrligi tiisti túzetýlerdi odan ári osy jylǵy 1 qarashaǵa deiingi merzimde Qazaqstan Respýblikasy Parlamentiniń Májilisine engizý úshin 2021 jylǵy 15 qazanda Qazaqstan Respýblikasy Premer-Ministri Keńsesine engizdi», - dedi Mádina Ábilqasymova.
