Qazaqstanda Investitsiialyq qorlar qaýymdastyǵyn qurý qajet. Bul týraly búgin «Digital Bridge» halyqaralyq innovatsiialyq forýmy aiasynda BAQ ókilderine suhbat bergen UVCA atqarýshy direktory Olga Afanaseva aitty, dep habarlaidy QazAqparat tilshisi.
«Saparymnyń negizgi maqsaty startap júiesimen tanysý. Osy jerde 100-ge jýyq startap usynylǵan eken. Jergilikti jáne sheteldik investorlar da óte kóp. Sondyqtan tájiribeńmen bólisip, bailanys ornatý óte mańyzdy. Jalpy qazaqstandyq startaptarmen endi tanysa bastadym», - dedi ýkrainalyq kompaniianyń basshysy.
Onyń aitýynsha, UVCA kompaniiasynda tehnologiialyq bilim alǵan injenerler kóp jumys isteidi. Sonyń arqasynda startap júiesi de jaqsy damyǵan.
«Endi sizder men bizdiń jetistikterimizdi biriktirip, kádege jaratqymyz keledi. Al Qazaqstannan ne kórip otyrmyn? Sizderde IT-indýstriiasyn damytýǵa degen saiasi erik-jigerdiń bar ekendigi qýantady. Bul salaǵa kapitalyn salýǵa daiyn jeke investorlar da jetkilikti. Menińshe, jahandyq ta, sheteldik de investorlar kire alatyn Investitsiialyq qorlar qaýymdastyǵyn qurý kelesi zańdy qadam bolar edi. Ol úshin barlyq múmkinshilik bar. Eń bastysy - bul niet pen innovatsiiany qabyldaýǵa daiyndyq», - dedi Olga Afanaseva.
Aita keteiik, forýmynyń ashylýynda QR Aqparat jáne kommýnikatsiialar ministri Dáýren Abaev Qazaqstan Aziia men Eýropa tehnologiialyq ortalyqtarynyń arasynda altyn kópirge ainalatyndyǵyn aitty.
Digital Bridge - Qazaqstandaǵy biylǵy jyly ótip otyrǵan basty innovatsiialyq oqiǵa.
Qatysýshylar forýmnyń dialogtik alańynda tsifrlandyrý salasyndaǵy sońǵy álemdik trendterdi talqylap, aldyńǵy qatarly tájiribelermen jáne biznes-modeldermen bólisedi. Forýmǵa halyqaralyq IT-qoǵamdastyǵynyń negizgi ókilderi, tehnologiia salasyndaǵy tanylǵan sarapshylar, kásiporyn basshylary, tehnologiialyq kásipkerler, sondai-aq birqatar eldiń memlekettik sektorlarynyń ókilderi, ǵalymdar, tsifrlyq ázirlemeler salasynyń mamandary, venchýrlyq investorlar qatysýda.
Forým aiasynda «Tsifrlyq ekonomika damýynyń jahandyq trendi jóninde dialogy» atty plenarlyq sessiiasy ótedi. Sonymen qatar sessiia jumysyna QR Premer-Ministri Baqytjan Saǵyntaev, Resei Federatsiiasynyń tsifrlyq damý, bailanys jáne buqaralyq kommýnikatsiialar ministri Konstantin Noskov qatysady dep kútilýde.
