2021 jyldyń 10 aiynda elimizde 17 800 internet-alaiaqtyq tirkeldi. Bul týraly QR IIM Kriminaldyq politsiia departamenti bastyǵynyń orynbasary Qanat Nurmaǵambetov aitty, dep habarlaidy QazAqparat.
«Internet-alaiaqtyq qazirgi tańdaǵy elimizde jáne búkil álemde oryn alyp otyrǵan ózekti máselelerdiń biri bolyp otyr. Memleket basshysy osy jylǵy Qazaqstan halqyna Joldaýynda alaiaqtyq qylmystarǵa qarsy naqty sharalar qabyldaý kerek ekenin atap ótti. Alaiaqtar azamattardy aldaý úshin ár túrli amaldardy qoldanady. Sol sebepten, osyndai qylmystardyń sany jyldan jylǵa kóbeiýde», - dedi ol IIM baspasóz alańynda ótken brifingte.
Qanat Nurmaǵambetovtiń atap ótýinshe, tsifrlyq tehnologiialardyń damýy olardy qoldaný arqyly jasalatyn urlyqtyń artýyna alyp keldi.
«Sońǵy ýaqytta internet-alaiaqtyq úlken qoǵamdyq rezonans týdyryp otyr. Eger 2019 jyly Qazaqstanda mundai qylmystardyń sany 7 700 bolsa, 2020 jyldyń qorytyndysynda 14 myńnan asyp tústi. Osy jyldyń 10 aiynda ótken jyldyń dál osyndai kezeńimen salystyrǵanda olardyń sany 80 paiyzǵa artyp, 17 800 qylmysqa jetip otyr», - dedi departament bastyǵynyń orynbasary.
