Úkimet basshysynyń orynbasary Roman Skliar indýstriialyq saiasat týraly zań jobasy ázirlenip jatqanyn málim etti, dep habarlaidy QazAqparat.
«Álemdegi jáne Qazaqstandaǵy pandemiiaǵa bailanysty kúrdeli jaǵdaida 2020 jyldyń 7 aiynda ónerkásip 3,8 paiyzǵa ósti. Ásirese, farmatsevtika 23,2 paiyzǵa, mashina jasaý 13,9 paiyzǵa, jeńil ónerkásip 7,3 paiyzǵa artty. El Prezidenti Qasym-Jomart Toqaev óz Joldaýynda naqty tapsyrmalardy berip, jumystyń joǵary qarqynyn belgiledi. Óńdeý ónerkásibinde óndiris kólemin 1,5 ese ulǵaitý boiynsha aýqymdy jumys júrgizý qajet. Osy maqsatqa jetý úshin básekelestik artyqshylyqtar men syrtqy naryqtaǵy eksporttyq múmkindikterdi birtindep arttyryp, ishki naryqta óńdeý ónerkásibiniń óndiristik áleýetin arttyrý boiynsha sharalar qabyldanady», - dedi Roman Skliar Úkimettiń baspasóz ortalyǵynda jýrnalisterge.
Premer orynbasarynyń aitýynsha, jyl sońyna deiin metall túrleriniń óndirisine qatysty otandyq kásiporyndar men qosymsha quny joǵary ónimderdi shyǵarý boiynsha olardy qaita óńdeýshiler arasynda ózara tiimdi yntymaqtastyq mehanizmi jasalady.
«Institýtsionaldyq negizdi saqtai otyryp júrgiziletin jumystarǵa jeńildik berý úshin indýstriialyq saiasat týraly zań jobasymen jumys bastaldy. Qazirgi ýaqytta zań jobasy ázirlenip, ony biznes jáne salalyq qaýymdastyqtar, ónerkásiptik kásiporyndar talqylaýda. Zań jobasynda qoldaý sharalarynyń quraldaryn keńeitý, memleketten, kvazimemlekettik sektordan jáne jer qoinaýyn paidalanýshylardan kepildendirilgen satyp alýlardy júzege asyrý sharalary eskerilgen», - dedi ol.
