Qazaqstanda importtyq taýar men azyq-túlik baǵasy 13% qymbattaǵan, dep habarlaidy QazAqparat Energyprom.kz saityna silteme jasap.
«Qańtar aiynyń qorytyndysy boiynsha qazaqstandyq óndirýshiler azyq-túlik suranysynyń basym bóligin jergilikti ónimmen qamtamasyz ete aldy. Un – 99,7%, jumyrtqa – 97,2%, jarma men kúrish – 96,6%, qus eti – 95,5%, ósimdik maiy – 88,8%, makaron ónimderi – 96,6%, kespe jáne basqa da uqsas un ónimderi – 85,1% jergilikti ónimmen qamtyldy.
Sút ónimderi segmentinde ózindik qamtý deńgeii – 84,4%. Alaida, jergilikti óndirýshiler sary maiǵa degen suranystyń 67,9%, irimshik ónimderine degen suranystyń 53,7% ǵana jaba bildi», - delingen maqalada.
Saittyń málimeti boiynsha, shujyq ónimderiniń 62,3%, kókónis pen jemistiń 50,2%, óńdelgen jáne konservilengen balyqtyń 47,6%, shokoladtyń 36,2%, qanttyń 35,8%, shai men kofeniń 29,9% jergilikti ónimmen qamtylǵan.
«Qańtar aiynyń qorytyndysy boiynsha importtyq taýar men azyq-túlik baǵasy bir jylda 12,8% qymbattaǵan. Onyń ishinde TMD elderinen keletin importtyń baǵasy 21,3%, ózge elderden keletin taýar baǵasy 4,9% ósken.
Azyq-túliktiń ishinde qant pen qanttan jasalatyn konditerlik ónim baǵasy 38,7%, et, balyq, teńiz ónimderiniń baǵasy 32,3%, mai ónimderi 26,9%, shujyq ónimderi 20,6%, kúnbaǵys maiy 15% qymbattaǵan», - dep jazady Energyprom.kz.
