Qazaqstan musylmandary dini basqarmasy tóraǵasynyń orynbasary, naib-múftii Baýyrjan Esmahan imamdardyń jalaqysy qansha ekenin aitty, dep habarlaidy Sputnik Qazaqstan tilshisi.
"Qazir QMDB-da imamdardyń jalaqysy 30-40 myń teńgeden bastap, 70-80-100 myń teńge aralyǵynda. Biz muny qazirgi zamanda kóp aqsha dep oilamaimyz. Sizder bilesizder, bizdiń imamdar qarajatty sol meshitte turǵan jáshikke qaiyrymdylyq retinde berilgen aqshadan alady. Al árbir meshittiń jaǵdaiy birdei emes. Úlken qalalar men keibir aýdan ortalyǵyndaǵy meshitterde bul jaǵynan qiyndyq bolmaýy múmkin. Al shaǵyn eldi mekenderde qarajat máselesi óte ózekti. Sebebi jáshikke túsken aqshadan imamnyń, naib-imamnyń, azanshynyń, tazalyqshy men kúzetshiniń ailyǵyn beredi. Sodan keiin kommýnaldyq tólemderin tóleidi. Munyń bárine aqsha jetkizý múmkin emes. Óitkeni qarajat halyqtyń meshitke kelýine bailanysty túsedi", — dedi naib-múfti OKQ-de "Ýaqyp" korporativtik qaiyrymdylyq qorynyń qyzmetine qatysty ótken baspasóz máslihatynan keiin.
Onyń aitýynsha, qarajat túsimi az, kommýnaldyq tólemaqyny tóleýge shamasy kelmei otyrǵan meshitterge "Ýaqyp" qory kómektesedi.
"Qor qurylmaǵanǵa deiin, qarajat máselesi demeýshiler arqyly sheshilip keldi. Biraq demeýshiler árdaiym turaqty emes, bir ai berip, ekinshi aida aqsham joq dep bas tartýy múmkin. Al "Ýaqyp" qory únemi qol ushyn sozady. Qordyń mindetteriniń biri de osy salada imamdarǵa kómegin kórsetý", — dedi Bas múftidiń orynbasary.
Baýyrjan Esmahan jalaqynyń azdyǵynan meshittegi qyzmetin tastap ketken imamdar joqtyń qasy deidi.
"Áleýmettik jaǵdaiym nashar, aqsha jaǵy qiyndaý dep meshitti tastap ketkender bolǵan joq. Men óz basym ondaidy estigen joqpyn. Biraq túrli sebeptermen basqa salaǵa aýysatyndar bar. Olar da ómir boiy dini qyzmetker bolyp júre bermeidi ǵoi. Kásipkerlik salasyna, memlekettik qyzmetke aýysqandar boldy. Biraq kóp jaǵdaida bizdiń qyzmetkerler shydaidy", — dedi ol.
