QR Eńbek jáne halyqty áleýmettik qorǵaý ministrliginde Qazaqstannyń barlyq óńirlerinde áleýmettik ID-kartalardy engizý máselesi boiynsha oblys jáne respýblikalyq mańyzy bar qala ákimdikterimen selektorlyq keńes ótti, dep habarlaidy QazAqparat.
Atalǵan ministrliktiń málimetine qaraǵanda, búgingi tańda áleýmettik kartalar Aqtóbe, Nur-Sultan jáne Almaty qalalarynda engizilgen. Olar jol aqysyn tóleýge, ataýly áleýmettik kómek, kepildik berilgen áleýmettik toptama jáne basqa da áleýmettik qyzmet túrlerin alýǵa múmkindik beredi.
Atap aitqanda, Aqtóbede «Qazposhta» AQ bank kartasy negizinde 40 myńnan astam áleýmettik karta shyǵaryldy. 6 ai ishinde aqsha ainalymy 841 mln teńgeni qurady. Kartalardyń ieleri mektep ashanalarynda tamaqtanýǵa, jolaqysyn tólep, tegin retsept boiynsha dári-dármek ala alady.
Nur-Sultanda Astra biryńǵai kólik kartasy jumys isteidi. 1,5 mln kartanyń 120 myńy oqýshylarǵa, 135 myńy azamattardyń jeńildikti sanattary úshin shyǵaryldy. Ortasha ailyq aqsha ainalymy 1,5 mlrd teńgeni qurady. Biryńǵai mektep kartasyn paidalana otyryp, qala oqýshylary Bala pay jáne Feeb me elektrondyq júieleri arqyly tamaqtanýdy tóleýge múmkindigi bar.
Almatyda bul júie «Ońai» kólik kartasynyń bazasynda jumys isteidi. 2,9 mln shyǵarylǵan kartanyń 333 myńy mektep oqýshylaryna, 422 myńy stýdentterge arnalǵan jáne 241 myńy – jeńildikti. Olar boiynsha ortasha ailyq ainalym 2 mlrd teńgeni qurady. «Ońai» kartalarynyń ieleri qoǵamdyq kólikte jol júrý aqysyn tólei alady, mýzeilerge, kitaphanalarǵa, kinoǵa biletter satyp ala alady, mádeni is-sharalarǵa qatysady. Almatyda mektep ashanalarynda tamaqtanýdy tóleý múmkindigin engizý josparlanyp otyr.
QR Eńbek jáne halyqty áleýmettik qorǵaý vitse-ministri Erlan Áýkenovtiń aitýynsha, ID-kartalardyń múmkindikteri keńeitiledi. Ardagerler, zeinetkerler, múgedektigi bar adamdar, tabysy az jáne kópbalaly otbasylar negizgi nysanaly toptar bolady. Ákimdikter ónim berýshilerdi ózderi tańdaidy. Qazirgi ýaqytta 13 óńir kimmen jumys isteitinin anyqtady.
Álemdik tájiribede áleýmettik ID-kartalar birqatar elderde paidalanylady. Mysaly, Avstriiada, Estoniiada, Malaiziiada, Italiia men Reseide adamdar áleýmettik tólemder men arnaiy plastikalyq kartalar arqyly járdemaqy alady.
