Elimizdiń áleýmettik infraqurylym obektilerinde gaz-aýa qospasynyń tutanýy, turmystyq ballondardyń jarylýy jáne gazben ýlaný boiynsha 55 jaǵdai tirkelgen. Bul týraly QR Tótenshe jaǵdailar vitse-ministri Mereke Pishembaev aityp berdi, dep habarlaidy QazAqparat.
«Ministrlikke kelip túsken aqparatqa sáikes, qazirgi ýaqytta elimizdiń áleýmettik infraqurylym obektilerinde gaz-aýa qospasynyń tarsyly men tutanýy, turmystyq ballondardyń jarylýy jáne gazben ýlaný boiynsha 55 jaǵdai tirkelgen (2020 jyly – 67 jaǵdai), onyń ishinde 33 gaz-aýa qospasy tarsyly, 16 turmystyq ballondardyń jarylýy, 6 gazben ýlaný bar. Barlyǵy 86 adam zardap shekti, onyń ishinde 14 bala bar, 21 adam qaitys bolsa, onyń ishinde 3 bala bar», - dedi vitse-ministr Ortalyq kommýnikatsiialar qyzmetinde.
Spikerdiń aitýynsha, joǵaryda atalǵan 55 jaǵdaidyń 36-sy turmystyq ballondardy paidalanýmen jáne olardyń aqaýymen tikelei bailanysty.
Sondai-aq, turmystyq gaz ballondarynyń ainalym tetigin jáne onymen bailanysty protsesterge (mai quiý, tasymaldaý, kóp márte qoldaný jáne esepten shyǵarý) taldaý júrgizilgen.
«Bul taldaý ballondar apatymen bailanysty kóptegen problemalardy kórsetedi, olardyń eń ózektisi mynalar:
- elde halyq paidalanatyn eski jáne merzimi ótken ballondar kóp, olardy toltyrý zańsyz júrgiziledi;
- ballondar parki eskirgen;
- ainalymdaǵy ballondarǵa esep júrgizilmeidi;
- ballondardy zańsyz toltyratyn gaz kompaniialary bar;
- ballondardy toltyrý jáne paidalaný protsesinde qaýipsizdik talaptary elenbeidi», - dep túsindirdi M. Pishembaev.
