Foto: Kff.kz
Senator Darhan Qydyráli óziniń depýtattyq saýalynda Qazaqstan fýtbolyna sheteldik legionerlerdi tartý, qarjylandyrýdyń ashyq emestigi jáne tóreshilerdiń match nátijelerine qatysty daýly sheshimderi máselelerin qozǵady, dep habarlaidy Ult.kz.
Onyń aitýynsha, klýbtardy qarjylandyrý men legionerlerge joǵary jalaqy tóleý máseleleri aitylmaityn taqyryp, bul qarjynyń tiimdi bólinýine baqylaýdy qiyndatady.
«Eýropanyń top quramalarynyń bapkerlerinen birazynan kóbirek jalaqy alatyn ulttyq quramanyń bas bapkeriniń ailyǵy qupiia. Kópshiligi jergilikti biýdjetke bailaýly fýtbol klýbtaryndaǵy legionerlerdiń ailyqtary da ashyq aitylmaidy. Kóptegen memleketterde fýtbolǵa qatysty arnaiy zań qabyldanǵan. Osy saladaǵy júiesizdik pen júgensizdikti retteý úshin bálkim bizge de fýtbol týraly arnaiy zań qabyldaýdyń ýaqyty kelgen shyǵar», - dedi senator.
Qydyráli «Atyraý-Aqtóbe» jáne «Atyraý-Astana» komandalary arasyndaǵy sońǵy matchtar týraly tóreshileriniń sheshimderi qoǵamda úlken dúmpý týǵyzǵanyn atap ótti. Alaida, bul jaǵdailarǵa qatysty qatań sharalar qabyldanbady, bul ulttyq chempionattyń ádildigine kúmán keltiredi. Onyń pikirinshe, Fýtbol federatsiiasy qazaqstandyq tóreshiler men jattyqtyrýshylardy daiyndaýdy belsendi túrde qoldaýy tiis, óitkeni qyzmet etetin 155 tóreshini oqytý deńgeii joǵary standarttarǵa sáikes kelmeidi. Bul Qazaqstannyń áli de álemdik týrnirlerge tóreshiler shyǵara almai otyrǵanyn jáne olardyń biliktiligin arttyrý qajettigin kórsetedi.
«Bir kezderi bizben deńgeiles bolǵan, qazir komandalary Olimpiada oiyndary men álem, Eýropa chempionattarynda kózge túsip júrgen Grýziia, Ózbekstan siiaqty elder balalar fýtbolyn qoldaý, mamandar daiarlaý, infoqurylymdy damytý, biryńǵai júie qabyldaý, fýtbol alańdary men stadiondar salý arqyly nátijege jetkeni belgili», - dedi senator.
