Et baǵasynyń jyldyq ósimi 8-10% qurap otyr. Al azyq-túlik taýarlarynyń dál osyndai ortasha ósim kórsetkishi nebári 5,5% qurap tur, dep habarlaidy Baq.kz aqparat agenttigi Ranking.kz portalyna silteme jasap.
Qazaqstandyqtar úshin et birte-birte qymbatqa túsip jatyr. Bir jyl ishinde siyr eti baǵasy qatty qymbattaǵan. Iaǵni, 9,9%-ǵa qymbattap, bir kilogramm siyr etiniń quny 1481 teńgeni quraǵan. Al qoi etiniń baǵasy 9%-ǵa artyp, bir kilogramm úshin 1390,1 teńge shamasynda bolǵan. Shoshqa eti men jylqy eti sáikesinshe 8,8%-ǵa qymbattap, bir kilogramm úshin 1254,3 teńgeni jáne 8%-ǵa qymbattap, bir kilogramm úshin 1619,9 teńgeni quraǵan.
Tek taýyq etiniń baǵasynda aitarlyqtai ózgeris joq. Sebebi, taýyq eti bar bolǵany 0,4%-ǵa qymbattap, bir kilogramm úshin quny 745 teńge shamasynda bolǵan.
Siyr eti men qoi etiniń eń qymbat baǵasy Astanada tirkelgen. Bul et túrleriniń bir kilogramm úshin quny sáikesinshe 1666 jáne 1720 teńgeni quraǵan. Al eń qymbat shoshqa etin jezqazǵandyqtar satyp alatyn bolǵan. Munda ettiń bir kilogramy úshin baǵa 1463 teńge sheginde bolǵan. Sol siiaqty Qaraǵandyda jylqy eti qymbat (bir kilogramy 1841 teńge) bolsa, Atyraýda qus eti qymbat (bir kilogramy úshin 890 teńge) kúiinde saqtalǵan.
Et ónidirisi kún artyp ósip keledi. 2 aidyń ishinde shyǵarylym kólemi 41 myń tonnaǵa jetken. Bul aldyńǵy jylǵy kórsetkishten 12,8%-ǵa artyq. Et óndirisiniń úlken kólemi Almaty, ShQO jáne Aqmola oblystarynda tirkelgen.
