Qazaqstanda epidemiiaǵa qarsy sharalar jospary ázirlengen. Bul týraly QR Prezidenti Qasym-Jomart Toqaev telearna arqyly úndeýinde aitty, dep habarlaidy "Ult aqparat".
«Memlekettik shekaradaǵy, stantsiialar men áýejailardaǵy ótkizý pýnktterinde sanitarlyq-epidemiologiialyq rejim kúsheitildi. Meniń tapsyrmammen dári-dármekterdi, test júielerin jáne zerthanalyq jabdyqtardy satyp alýǵa Úkimet rezervinen qarajat bólindi. Elimizdiń aýrýhanalarynda tósek-oryn sany jetkilikti. Memlekettik organdar sanitarlyq-profilaktikalyq jáne epidemiiaǵa qarsy sharalardy uiymdastyrýdyń josparlaryn ázirlep qoidy», - dedi Memleket basshysy telearnalar arqyly kórsetilgen úndeýinde.
Prezident Qazaqstan azamattaryn ýákiletti qyzmetterge kómektesýge shaqyrdy.
«Mundai jaǵdaida bárimiz jaýapkershilik pen tártip kórsetýimiz qajet. Aýrý belglerii baiqalsa, dereý turǵylyqty jerińizdegi meditsinalyq qyzmetke júginińiz. Meditsinalyq tekserýden jaltaryp, karantin rejimin buzǵandar jazalanady. Ózińizge jáne jaqyn adamdaryńyzǵa qamqorlyqtyń qarapaiym joldaryn este ustańyz: qolyńyzdy únemi jýyp, sanitarlyq gigienany saqtańyz, halyq kóp jinalatyn oryndarǵa barmańyz», - dedi Q. Toqaev.
Sonymen birge, Prezident bul kúnderi meditsina qyzmetkerlerine aýyrtpalyq túsetinin eske saldy.
«Kóp nárse olardyń kásibiligine bailanysty bolmaq. El ómirindegi kúrdeli kezeńnen bizdiń dárigerler abyroimen ótip, qazaqstandyqtardyń densaýlyǵyn saqtaý úshin bar jaǵdaidy jasaýy kerek», - dedi Memleket basshysy.
Aita keteiik, QR Prezidenti Qasym-Jomart Toqaev el halqyna úndeý joldady. Joldaýdyń tolyq mátini arnaiy jariialandy.
