Foto: ashyq derekkóz
Qazaqstanda jyldamdyqty belgilengen mólsherden asyrǵandar úshin aiyppul mólsheri eki ese artady. Endi zań buzǵandar úshin 40 ailyq eseptik kórsetkish (AEK) kóleminde aiyppul tóleý qajet bolady, bul 2024 jyly 147 680 teńgeni quraidy. Eger bir jyldyń ishinde quqyqbuzýshylyq qaitalansa, aiyppul 60 AEK-ke deiin ósip, 221 520 teńgege jetedi. Bul týraly 31 arnanyń "Informbiýro" jańalyqtary habarlady.
Memleket basshysy jol qozǵalysyn uiymdastyrýǵa qatysty eki zańǵa birdei qol qoidy.
Olardyń birinde ákimshilik quqyq buzýshylyq týraly kodekske ózgerister engizilip, júrgizýshilerge arnalǵan aiyppuldardyń jańa mólsheri bekitildi. Bul aiyppuldar eki aidan keiin kúshine enedi.
Jańa ózgeristerge sáikes, jyldamdyq rejimin 60 km/saǵ nemese odan kóp asyrǵan avtokólik ieleri 40 ailyq eseptik kórsetkish (AEK) mólsherinde aiyppul tóleitin bolady, bul 2024 jyly 147 680 teńgeni quraidy.
2025 jyly AEK mólsheri 3 932 teńgege deiin ósedi dep kútilýde, sondyqtan bul aiyppul 2025 jyly 157 280 teńgege deiin artady.
Bir jyldyń ishinde qaitalanǵan quqyqbuzýshylyq úshin aiyppul 60 AEK-ke (2024 jyly 221 520 teńge, 2025 jyly 235 920 teńge) deiin kóteriledi.
Qazirgi ýaqytta jyldamdyqty asyrǵany úshin aiyppuldar kelesi mólsherde:
- 10-20 km/saǵ asyrǵany úshin – 5 AEK (2024 jyly 18 460 teńge),
- 20-40 km/saǵ asyrǵany úshin – 10 AEK (36 920 teńge),
- 40 km/saǵ nemese odan kóp asyrǵany úshin – 20 AEK (73 840 teńge). Al qaitalanǵan jaǵdaida aiyppul 110 myń teńgege deiin barady.
Osylaisha, eki aidan keiin bul tizimge jyldamdyqty 60 km/saǵ nemese odan da kóp arttyrǵandar úshin tólenetin aiyppul qosylady jáne óndiriletin aiyppul kólemi eki ese artady.
Alaida jańa ózgerispen kólik júrgizýshileriniń biri kelisse biri kelispeidi.
"Sózdiń ashyǵy iyppul salyp tonap jatyr ǵoi. Kishkene júrip, árbir baǵdarshamǵa jetkenshe eki aiyppul alasyń ǵoi. Onyń bári durys emes”, “Joq, endi jyldam júretinder bar ǵoi. Biraq endi myna aiyppuldy kóbeitý bizge óte qymbat. Bizdiń ómir súrý jaǵdaiymyzǵa kelmeidi. Tym kóp”, “Endi aiyppuldy kóbeitemiz dep jatyr ǵoi, onysyn bilmeimin. Biraq qala jyldam júretinder, qatty júretinder kóp qoi", – deidi turǵyndar.
