Sonymen qatar, zań aiasynda azamattar men biznes ókilderinen aqparat júielerinde bar málimetti talap etýge tyiym salyndy.
"Bul ózgerister mekemelerge qujattardyń qaǵaz balamasyn, kóshirme jasaýǵa ketetin ýaqyt pen aqsha shyǵynyn jáne usyný qajettigin boldyrmaidy", - dedi TsDIAÓM qyzmetkerleri.
Zań elektron qujattardy qaǵaz qujattarǵa balama dep bekitti.
"EGov mobile tsifrlyq qujat servisiniń qoldaný aiasy keńeitildi. Árbir azamat eGov mobile baǵdarlamasyn óz smartfonyna júktei alady, bul qaǵaz qujattardy alyp júrmeýge múmkindik beredi", - dep túsindirdi ministrliktegiler.
Sondai-aq, ministrlik zańmen azamattyq hal aktilerin memlekettik tirkeý kýálikterin berý tártibi ózgertilgenin habarlady.
"Endi týý, neke, ajyrasý, qaitys bolǵany týraly kýálikter memlekettik tirkeýden ótkennen keiin azamattyń Egov-taǵy jeke kabinetine túsedi. Bul rette kýálikterdiń qaǵaz nusqasyn alý quqyǵy ótinishhat berilgen jaǵdaida saqtalady", - delingen habarlamada.
Prezident qol qoiǵan zań mynadai múmkindik beredi:
- memlekettik qyzmetterdi alý kezinde azamattar men biznes úshin túrli shyǵyndy azaitýǵa;
- aýyl men qala turǵyndarynyń tsifrlyq teńsizdigin tómendetýge;
- memlekettik apparatty ustaýǵa jumsalatyn shyǵyndardy qysqartýǵa;
- qabyldanatyn basqarýshylyq sheshimder tiimdiligin arttyrýǵa;
- aqparattyq qaýipsizdikti kúsheitýge;
- memlekettik organdardyń qaitalanatyn fýnktsiialaryn qysqartýǵa.
Eske salaiyq, 15 shildede Memleket basshysy Qasym-Jomart Toqaev "Qazaqstan Respýblikasynyń keibir zańnamalyq aktilerine innovatsiialardy yntalandyrý, tsifrlandyrýdy, aqparattyq qaýipsizdikti damytý jáne bilim berý máseleleri boiynsha ózgerister men tolyqtyrýlar engizý týraly" zańyna qol qoiǵan bolatyn.
Al bir kún buryn Úkimettiń keńeitilgen otyrysynda Memleket basshysy Qazaqstanda tsifrlandyrý isi baiaý jáne nashar júrip jatqanyn aitqan edi.
