Memleket Basshysy Qasym-Jomart Toqaevtyń Jarlyǵyna sáikes elimizdiń 2025 jylǵa deiingi damýynyń ulttyq jospary bekitildi, dep habarlaidy "Ult aqparat" Ulttyq ekonomika ministrligine silteme jasap.
Atalǵan qujatty QR Prezidenti Qasym-Jomart Toqaevtyń tapsyrmasy boiynsha Ulttyq ekonomika ministrligi Strategiialyq josparlaý jáne reformalar agenttigimen birlesip ázirledi.
Eldiń 2025 jylǵa deiingi damýynyń ulttyq josparynda jańa ekonomikalyq baǵytymyzdyń negizgi mindetteri men parametrleri aiqyndalǵan. Qujatta asa mańyzdy salalardy damytý jónindegi strategiialyq paiym, koronadaǵdarys saldaryn jumsartýǵa jáne jańa ekonomikalyq naqtylyq pen aǵymdaǵy jahandyq úrdister jaǵdaiynda ekonomikanyń ornyqty, inkliýzivti jáne sapaly damýyn qamtamasyz etýge baǵyttalǵan negizgi saiasatty jetildirý jónindegi baǵdarlar kórsetilgen.
«Jospar halyqtyń ómir súrý sapasy men ál-aýqatyn arttyrýǵa baǵyttalǵan túbegeili institýtsionaldyq jáne salalyq reformalar úshin negiz qalaidy.
Naqty strategiialyq kórsetkishterdiń egjei-tegjeili kartasy ulttyq jospardyń ajyramas bóligi bolyp tabylady, oǵan qol jetkizý úshin ekonomikanyń ózindik jetkiliktiligin arttyrý, ártaraptandyrý, investitsiialardy targettelgen tartý, eksportty belsendi ilgeriletý, jeke kásipkerlikti qoldaý jáne keshendi damytý arqyly onyń jańa qurylymyn qalyptastyrý boiynsha naqty sharalar qabyldanady», delingen habarlamada.
Ministrliktiń málimetinshe, densaýlyq saqtaý men bilim berý qyzmetterin jaqsartýǵa, infraqurylymdy damytýǵa, nátijeli jumyspen qamtýǵa jáne halyqtyń áleýmettik ál-aýqatyn arttyrýǵa erekshe nazar aýdarylady.
Sondai-aq, Memleket basshysy Memlekettik josparlaý júiesiniń jańa quraly bolyp tabylatyn «Qazaqstan Respýblikasynyń 2025 jylǵa deiingi jalpyulttyq basymdyqtary týraly» Jarlyqqa qol qoidy.
Jalpyulttyq basymdyqtar (JUB) úsh túiindi baǵyt boiynsha 10 naqty mindetti bildiredi: azamattardyń ál-aýqaty, institýttardyń sapasy jáne kúshti ekonomika qurý.
«Áńgime jaqyn keleshekte reformalar júzege asyrylatyn on baǵyt týraly bolyp otyr: ádil áleýmettik saiasat, densaýlyq saqtaýdyń qoljetimdi jáne tiimdi júiesi, sapaly bilim berý, azamattardyń múddelerin qorǵaýǵa arnalǵan ádil jáne tiimdi memleket, memlekettik basqarýdyń jańa modeli, patriotizm qundylyqtaryn dáripteý, ulttyq qaýipsizdikti nyǵaitý, ártaraptandyrylǵan innovatsiialyq ekonomika qurý, ekonomikalyq jáne saýda diplomatiiasyn belsendi damytý jáne teńgerimdi aýmaqtyq damý.
Ulttyq damý josparynyń jáne jalpyulttyq basymdyqtardyń barlyq indikatorlary búkil memlekettik apparat jumysynyń ózekti baǵyttaryn aiqyndaidy. Kórsetilgen strategiialyq qujattardy iske asyrý qazirgi kezeńniń syn-qaterlerin eńserýge baǵyttalǵan jáne ortamerzimdik perspektivada eldiń halyqtyń ómir súrý sapasy men tabysynyń naqty ósýimen qatar júretin ornyqty jáne sapaly ekonomikalyq ósý traektoriiasyna shyǵýyn qamtamasyz etýge arnalǵan», delingen habarlamada.
Eske sala ketsek, Aqordada Memleket basshysy Qasym-Jomart Toqaevtyń tóraǵalyǵymen Reformalar jónindegi Joǵary keńestiń úshinshi otyrysynda eldi damytýdyń 2025 jylǵa deiingi ulttyq jospary daiyndalatyny málim etilgen edi.
