QR Qarjy naryǵyn retteý jáne damytý agenttiginiń tóraǵasy Mádina Ábilqasymova tólem jasaýǵa qabiletsiz bankterden jáne problemalyq kreditterden tazartý jumystary týraly aityp berdi, dep habarlaidy QazAqparat tilshisi.
«2021 jyly bank sektoryn tólem jasaýǵa qabiletsiz bankterden jáne jinaqtalǵan problemalyq kreditterden qalpyna keltirý aiaqtaldy. Sońǵy eki jylda naryqtan 5 bank ketti. 2017 jyldan bastap 8 banktiń litsenziiasy qaitaryp alyndy, 3 iri bank shoǵyrlandyryldy. Jalpy alǵanda, 2017-2021 jyldary 6,6 trln teńge somadaǵy kreditter esepten shyǵaryldy», - dedi M. Ábilqasymova Qazaqstan qarjygerleriniń IX Kongresinde..
Onyń aitýynsha, bank sektoryn tazartý nátijesinde NPL aýqymdy anyqtamasyn sipattaityn problemalyq jáne qaita qurylymdalǵan kreditter deńgeii 2017 jylǵy 40%-dan 2021 jylǵy qazanǵa qarai 10%-ǵa deiin 4 ese tómendedi. Bul rette 90 kúnnen astam merzimi ótken NPL ózi 4,3%-dy qurady.
«Jumys istemeitin aktivterdi bankter balansynan esepten shyǵarýǵa qaramastan, bank júiesiniń aktivteri sońǵy úsh jylda 41%-ǵa ulǵaiyp, 35,6 trln teńgeni qurady. 2019-2020 jyldary júrgizilgen Aktivter sapasyn baǵalaý (AQR) kapitaldyń qajetti qory bar ekenin júielik jáne jeke deńgeide rastady. AQR qorytyndysy boiynsha 2020 jyly bankterdiń aktsionerleri bankterdi 128 mlrd teńgege ústeme kapitaldandyrdy, qosymsha proviziialar áseri jáne aktivter sapasyn jaqsartý boiynsha sharalar 600 mlrd teńge somaǵa baǵalandy. Nátijesinde búgingi kúni bankterdiń kapital jetkiliktiligi 25% boldy, bul eń az talaptardan 3 esege artyq», - dedi agenttik tóraǵasy.
