«Ulttyq aqparattyq tehnologiialar» AQ Basqarma tóraǵasy Rostislav Koniashkin memlekettik qyzmetterdi smartfondaý men tsifrlyq qujattardy paidalaný úrdisi týraly aityp berdi, dep habarlaidy QazAqparat.
Ótken jyly qazaqstandyqtar eGov arqyly 50 mln-nan astam memlekettik qyzmet alǵan jáne bul kórsetkish jyldan-jylǵa artyp keledi. «Ulttyq aqparattyq tehnologiialar» kompaniiasy elektrondy úkimettiń jumysyna jaýap beredi. 2022 jyly «UAT» AQ ázirleýshileri kóptegen qyzmetterdi turǵyndardyń uialy telefondaryna aýystyrýǵa nietti.
«2022 jyly memlekettik qyzmetterdi smartfonǵa aýystyrýǵa basa kóńil bólemiz. Muny Prezident te aitqan. Qazir noýtbýk pen kompiýter ustaý azaiǵanyn bárimiz túsinemiz. Barlyq turǵyndar uialy qosymshalardy, telefondardy paidalanady. Ásirese qarjy sektoryn damytýdyń arqasynda asa tanymal bola tústi», - dedi R. Koniashkin «Habar 24» telearnasyndaǵy «Tsifrlyq Qazaqstan» baǵdarlamasynda.
Onyń aitýynsha, qazir smartfonnyń kómegimen 150 myń memlekettik qyzmet qoljetimdi. Memlekettik qyzmetterdi, onyń ishinde qujattardy tsifrlandyrý arqyly basqa qalaǵa nemese elge ushar aldynda qaǵaz pasporttyń ornyna elektrondy pasportty kórsetýge bolady.
«Qazir tsifrlyq qujattar arqyly ushaqpen de ushýǵa bolady, 2021 jyly oǵan elimizdiń barlyq áýejailaryn qostyq. Poiyzda da, ekinshi deńgeili bankterde de tsirflyq qujatty kórsetýge bolady. Jaqynda ǵana normativtik-quqyqtyq aktilerge ózgerister engizildi. Sondai-aq, valiýta aiyrbastaý kezinde de tsifrlyq qujattardy paidalanýǵa bolady. Biz bul tizimdi árdaiym keńeitip otyramyz», - dep túsindirdi Rostislav Koniashkin.
EGovmobile ázirleýshileriniń aitýynsha, qazirdiń ózinde tsifrlyq qujattardy 6,5 mln-nan astam turǵyn paidalanady. 2019 jylǵy aqpannan bastap, qazaqstandyqtar tsifrlyq qujattardy 32 mln ret, áýejailarda ushý kezinde 20 myń ret paidalanǵan.
