Aýa raiynyń qolaisyzdyǵyna qaramastan, elimizde 16,4 mln tonna astyq bastyrylyp, ortasha ónimdiligi 10,3 ts/ga qurady, dep habarlaidy "Ult aqparat" Aýyl sharýashylyǵy ministrligine silteme jasap.
Bastapqy salmaqta 80,8 myń tonna qaraqumyq jinaldy, bul 2020 jylǵy deńgeiden 76% artyq. Sondai-aq, qara bidai jinaý qorytyndysy boiynsha ótken jylmen salystyrǵanda 43% artyq, dándik júgeri 22,6%, burshaq daqyldary 1,3% artyq jinaldy. Bastapqy salmaqtaǵy tary ónimdiligi ótken jylmen salystyrǵanda - 15%, júgeri 5% artty.
Jańa eginniń astyǵy joǵary sapaly kórsetkishterge ie. Máselen, litsenziialanǵan astyq qabyldaý kásiporyndaryna tapsyrylǵan jumsaq bidaidyń jalpy kóleminiń 90,5%-y 1-3 synyptarǵa jatqyzylǵan, 2020 jyly bul kórsetkish 81,2%-dy quraǵan bolatyn.
Quramynda dánmańyzy joǵary bidai úlesiniń aitarlyqtai ósýi baiqalady. 3-synypty jumsaq bidai kóleminde álemdik naryqta joǵary suranysqa ie joǵary sapaly HI-Pro bidaiynyń úlesi shamamen 60%-dy quraidy.
Jalpy, ósirilgen astyq ishki naryqty tolyq qamtamasyz etý úshin, sondai-aq eksportqa belgili bir kólemdi jóneltý úshin de jetkilikti.
Sonymen qatar, 3,9 mln tonna kartop, 4,9 mln tonna kókónis daqyldary, 2,8 mln tonna baqsha daqyldary jinaldy.
Maily daqyldardy jinaý jalǵasýda, olardyń jalpy jinaý alańynan 3,0 mln ga (96,6%) jinaldy, 2,3 mln tonna bastyryldy.
