Qazaqstannyń kórikti jerleri men kieli oryndaryna týristerdi kóptep tartý maqsatynda e-týrizm taqyryptyq portaly qurylady, dep habarlaidy "Ult aqparat".
Bul týraly «Kazakh Tourism» UK» AQ basqarma tóraǵasy Rashid Kúzembaev elordada ótip jatqan «Qazaqstandyq týristik ónimdi qalyptastyrý jáne damytý máseleler» konferentsiiasynda málim etti.
«Qazaqstannyń týristik salasyn tsifrlandyrýǵa basty nazar aýdarylýy tiis. Bul baǵyttaǵy negizgi jobalardyń biri - aqparatqa qoljetimdilik, onlain-tirkeý múmkindigi, keri bailanys ornatý jáne týristik qyzmet sapasyna monitoring jasaý, mańyzdy statistikalyq derekter alý máselelerin sheshetin biryńǵai júie qurý. Bul júie týrister úshin ǵana emes, biznes pen memleketke de tiimdi bolmaq. Biz usynatyn e-týrizm portaly men mobildi qosymsha Qazaqstannyń kórikti mekenderi men kieli oryndaryna týristerdi kóptep tartýǵa septigin tigizedi», - dedi Rashid Kúzembaev.
Sonymen birge, basqarma tóraǵasy ulttyq kompaniia qyzmetiniń aqparattyq-saraptamalyq baǵyty aiasynda týristik sala mamandaryna ádistemelik qoldaý kórsetý maqsatynda turaqty túrde áleýetti naryqtardy zertteý men jahandyq trendterge taldaý jasalatynyn atap ótti.
Basqarma tóraǵasy keltirgen derekterge sáikes, týristik sala sońǵy onjyldyqta qarqyndy túrde damyp, álemdik ekonomikadaǵy tez ósip kele jatqan sektordyń birine ainaldy. Búginde týrizm álemdik eksport pen álemdik JIÓ qurylymynyń 10 paiyzyn quraidy, dúniejúzindegi árbir onynshy jumys orny týrizm salasynda paida bolady.
