Elimizde adam densaýlyǵyna kúshti áser etetin zattardyń ainalymyna qatysty jańa zań jobasy daiyndalyp jatyr. Jańa zańǵa sáikes jaýapkershilik kúsheitilmek.
Bul týraly QR Ishki ister ministrliginiń Esirtki qylmysyna qarsy is-qimyl departamentiniń basshysy, politsiia polkovnigi Erlan Omarbekov málim etti, dep habarlaidy QazAqparat.
«Búginde biz Senatpen birlesip kúshti áser etetin zattardyń zańsyz ainalymy úshin jaýapkershilikti kózdeitin zań jobasyn ázirleýge kiristik. Maqsat - áseri kúshti himiialyq zattardy meditsinalyq emes turǵyda qoldanyp, taratyp jáne saqtaǵan jaǵdaida jaýapkershilikti kúsheitý. Bul másele el aýmaǵynda erkin satylyp jatqan keibir dári-dármekterge de qatysty bolyp otyr. Oǵan jasóspirimderdiń psihoaktivti zattar áýes bolýy da sebep bolyp otyr. Sonyń biri tramadol, bul retsept boiynsha satylatyn dári-dármek, onyń quramynda sintetikalyq opioidty analgetik bar. Basqasha aitqanda, tramadol jasóspirimderdi nashaqorlyqqa bastaityn alǵashqy saty desekte bolady. Sondyqtanda atalǵan fakt alańdaýshylyq týdyryp otyr», - dedi Erlan Omarbekov.
Sondai-aq, spiker atalǵan dáriden bólek, jasóspirimder qumartatyn basqa da preparattardyń baryn aitty.
«Adam ómiri men densaýlyǵyna ziiandy yqpal ári kúshti áser etetin zattardyń tizbesi Úkimettiń 2021 jylǵy 10 maýsymdaǵy № 396 qaýlysymen bekitilgen. Ony elge ákelý jáne qoldanýdy tek qana densaýlyq saqtaý organdary júzege asyrady. Osy oraida adamdy eseńgirtip, sońy táýeldilikke ákeletin himiialyq jáne meditsinalyq zattarǵa qatysty jaýapkershilikti kúsheitý kezek kúttirmeitin másele. Jáne ol úshin qylmystyq jaza qarastyrylǵanyn eskertkimiz keledi», - deidi ol.
