Foto: who.int
Qazaqstanda Dúniejúzilik densaýlyq saqtaý uiymynyń (DDSU) saity prokýrordyń talaby boiynsha buǵattaldy. Bul týraly Digital Paradigm direktory Eljan Qabyshev málimdedi, - dep habarlaidy Tengrinews.kz agenttigi.
"Biyl 14 qazanda Talǵar aýdany prokýrorynyń talap aryzy boiynsha Almaty oblysy Talǵar aýdandyq soty ózine qol jumsaý týraly aqparat taratqany úshin Dúniejúzilik densaýlyq saqtaý uiymynyń (DDSU) saityn buǵattaý týraly sheshim shyǵardy. Alaida olar habarlama almaǵan. Bilmeimin, bul meniń oiymsha, durys emes", - dedi Qabyshev Almatyda ótken "Media Quryltaida".
Dúniejúzilik densaýlyq saqtaý uiymy saitynyń Qazaqstan aýmaǵynda ashylmaǵany týraly Facebook-te basqa qazaqstandyq qoldanýshylar – densaýlyq saqtaý jáne meditsina salasyndaǵy sarapshylar da habarlady.
Sot mundai protsess shynymen bolǵanyn rastady. Ony Almaty oblysy Talǵar aýdandyq sotynyń sýdiasy N.B. Sársenbaev qaraǵan. Talǵar aýdanynyń prokýrory memleket múddesinde aryzdanǵan. Sot úkimi 2022 jyldyń 14 qazanynda shyǵaryldy.
"Osy internet-resýrstarda paidalanýshylarǵa óz-ózine qol jumsaýdyń egjei-tegjeili ádisteri, tásilderi men usynystary aitylady. Internettiń azamattarǵa, onyń ishinde kámeletke tolmaǵan balalar men jastarǵa qoljetimdiligin eskere otyryp, bul aqparat qolaisyz áleýmettik jaǵdaidyń qalyptasýyna qaýip tóndiredi", - delingen sot qujatynda.
Dáleldeý bóliginde sot shynymen de aryzdanýshy kórsetken internet-resýrstarda "adamdy ómirden aiyrý ádisteri týraly aqparat, sondai-aq sýitsidtik kóńil kúidi nasihattaityn aqparat bar" delingen.
"Qazaqstanda adam jáne onyń ómiri eń joǵary qundylyqtardyń biri retinde tanylatynyn jáne internet-resýrstarda adamdy ómirden aiyrý, ony óz ómirinen qasaqana aiyrýǵa itermeleitin ádister týraly aqparat bar ekenin eskere otyryp, prokýrordyń málimdemesi qanaǵattandyrýǵa jatady", - delingen sot qaýlysynda.
Sheshimniń oryndalýy Aqparat jáne qoǵamdyq damý ministrligine júktelgen.
Joǵarǵy Sot málemetinshe, sheshimge eshkim shaǵymdanbaǵan jáne ol zańdy kúshine engen.
"Prokýror saitty jabýdy suraǵan joq, tek sýitsid týraly jazbany. Sait týraly áńgime bolǵan joq. Sondyqtan sheshimniń qalai oryndalǵany basqa másele", - dep qosty Joǵarǵy Sot janyndaǵy Sottardyń qyzmetin qamtamasyz etý departamenti basshysynyń orynbasary Eldos Jumaqsanov.
