2021 jyldyń 1 sáýirinen bastap Biryńǵai jinaqtaýshy zeinetaqy qorynan ai saiynǵy tólemdi esepteýdi júzege asyrý ádistemesi ózgeredi. Osy oraida atalǵan qordyń baspasóz qyzmeti BJZQ-dan zeinetaqy tólemderin júzege asyrý tártibine túsinikteme berdi.
BJZQ-dan zeinetaqy tólemderi alýshynyń jeke zeinetaqy shotyndaǵy jinaqtary taýsylǵanǵa deiin QR Úkimetiniń №1042 qaýlysyna sáikes eseptelgen mólsherde belgilengen keste boiynsha ai saiyn júzege asyrylady.
«Qoldanystaǵy tártipke sáikes tólemderdiń jyldyq somasy jinaqtalǵan somanyń zeinetke shyqqannan keiin 79 jasqa deiingi ortasha ómir súrý uzaqtyǵyn eskeretin aǵymdaǵy qun koeffitsientine kóbeitindisi retinde esepteledi. Bul rette zeinetaqy tólemderin indeksteý kózdelmegen», - delingen BJZQ baspasóz qyzmetiniń málimetinde.
Budan basqa, BJZQ-dan tólenetin ai saiynǵy tólemderdiń mólsheri zeinetaqy jinaqtarynyń aǵymdaǵy qaldyǵynyń tómendeýin eskere otyryp, jyl saiyn tómendetiledi. Nátijesinde, jańa kúntizbelik jyldaǵy ai saiynǵy tólemderdiń mólsheri ótken jylǵa qaraǵanda tómen bolyp qalyptasady.
Tólemderdiń aǵymdaǵy tártibi ziiandy eńbek jaǵdailary bar jumystarmen ainalysatyn qyzmetkerlerdiń, sondai-aq, 1 jáne 2-toptardaǵy merzimsiz múgedektigi bar adamdardyń, iaǵni osyndai sanattaǵy azamattardyń zeinetke shyqqannan keiingi ómir súrý uzaqtyǵyndaǵy qazirgi aiyrmashylyqqa bailanysty múddelerin eskermeidi.
«Zeinetaqy tólemderiniń mundai tártibi 90-jyldardyń aiaǵy men 2000-jyldardyń basynda qabyldandy jáne halyqaralyq tájiribe men búgingi kúnniń bolmysyn eskere otyryp, ózektendirýdi talap etti.
Ótken 20 jyl ishinde Qazaqstanda zeinetkerlik jasqa tolǵannan keiingi ómir súrý uzaqtyǵy ósip, sáikesinshe er adamdar úshin 80 jas jáne áielder úshin 82 jasty qurady. Tólemderdiń jańa tártibi zeinetaqy tólemderi kezeńin alýshylardyń ómir súrý uzaqtyǵynyń ortasha kezeńimen sáikestendiredi, sondai-aq, BJZQ-dan tólenetin zeinetaqy tólemderiniń jyl saiynǵy qaita esepteýin 5%-ǵa qamtamasyz etedi», - dep atalyp ótken Qor habarlamasynda.
Sonymen qatar, eńbek jaǵdailary ziiandy jumystarmen ainalysatyn qyzmetkerler, 1 jáne 2-toptaǵy merzimsiz múgedektigi bar adamdar úshin zeinetaqy tólemderiniń mólsherine qosymsha ulǵaitý koeffitsientteri kózdelgen.
Osylaisha, Úkimet Qaýlysynda azamattardyń ártúrli sanattarynyń ómir súrý jáne eńbek etý uzaqtyǵy men jaǵdailary eskerilgen.
«Sondai-aq, BJZQ-dan tólenetin eń tómengi zeinetaqy tóleminiń mólsheri de ósti. Buryn ol árbir qarjy jylyna belgilengen eń tómengi kúnkóris deńgeiiniń 54% qurasa, endi eń tómengi kúnkóris deńgeiiniń 70% deiin ulǵaityldy. Nátijesinde, eń tómengi zeinetaqy tólemderin alýshylar úshin BJZQ-dan ai saiyn beriletin zeinetaqy tólemderi ulǵaiatyn bolady.
Úkimettiń Qaýlysyna sáikes, alýshylarǵa zeinetkerlikke shyqqan birinshi jyly tólenetin ai saiynǵy tólemderdiń mólsheri 6,5% mólsherlememen jinaqtalǵan zeinetaqy somasynyń on ekiden bir kóbeitindisi retinde anyqtalatyn bolady. Budan ári tólemderdiń mólsheri jyl saiyn indeksteý esebinen ulǵaiatyn bolady, iaǵni tólemder zeinetaqy jinaqtarynyń aǵymdaǵy somasyna áser etetin investitsiialyq tabystylyqtyń qubylmalylyǵyna bailanysty bolmaidy», - dep naqtylady BJZQ mamandary.
Olardyń paiymynsha, munyń bári azamattarǵa zeinetaqy tólemderiniń túsinikti ári boljamdy tártibin qamtamasyz etedi.
Tólemderdiń ózgertilgen tártibi 2021 jylǵy 1 sáýirden bastap týyndaǵan qatynastarǵa qoldanylady.
BJZQ-dan zeinetaqy tólemderin alý quqyǵyn 2018 jylǵy 1 qańtarǵa deiin iske asyrǵan adamdarǵa zeinetaqy tóleminiń jyl saiynǵy mólsheri saqtalady jáne eń tómen zeinetaqynyń otyz eselengen mólsherinen kem bolmaidy (2021 jyly 30 h 43 272 = 1 298 160 teńge). Tólemder buryn tańdalǵan keste boiynsha júzege asyrylady.
«BJZQ-dan zeinetaqy tólemderin alý quqyǵyn 2018 jylǵy 1 qańtardan bastap 2021 jylǵy 31 naýryzǵa (qosa alǵanda) deiin iske asyrǵan adamdarǵa zeinetaqy tólemderiniń mólsherin esepteýdi júzege asyrýdyń jańa ádistemesine sáikes, 2022 jylǵy 1 qańtardan bastap ai saiynǵy zeinetaqy tólemderi 5% indeksteý mólsherlemesine ulǵaitylatyn bolady, keiinnen jyl saiyn qaita eseptelip otyrady», - delingen BJZQ málimetinde.
BJZQ-dan zeinetaqy tólemderi jeke zeinetaqy shotyndaǵy zeinetaqy jinaqtary taýsylǵanǵa deiin burynǵydai júzege asyrylatyn bolady.
