Foto: dzen.ru
Qazaqstanda biryńǵai ýaqyt beldeýi belgilenedi, - dep habarlaidy "Ult aqparat" Saýda jáne integratsiia ministrligine silteme jasap.
Vedomstvo málimetinshe, «Qazaqstan Respýblikasynyń aýmaǵynda ýaqytty esepteý tártibi týraly» Úkimet qaýlysyna ózgerister engizilgen. Ózgeristerge sáikes, 2024 jylǵy 1 naýryzda saǵat 00:00-den bastap eldiń búkil aýmaǵynda biryńǵai ýaqyt beldeýi ornatylady.
Osylaisha, Qazaqstan Respýblikasynyń búkil aýmaǵyna 5-shi ýaqyt beldeýi (UTC+5) qoldanylady.
«Qazaqstan Respýblikasynyń aýmaǵyndaǵy ýaqytty esepteý tártibi týraly» Qazaqstan Respýblikasy Úkimetiniń 2000 jylǵy 23 qarashadaǵy N 1749 qaýlysyna engizilgen ózgertýlerge sáikes, «Astana, Almaty qalalarynyń ákimdikteri, Shymkent, Aqmola, Almaty, Jambyl, Qaraǵandy, Qostanai, Pavlodar, Soltústik Qazaqstan, Túrkistan, Shyǵys Qazaqstan oblystarynda jáne Abai, Jetisý, Ulytaý oblystarynda 2024 jylǵy 29 aqpannan 1 naýryzǵa qaraǵan túni (saǵat 00:00-de) jergilikti ýaqytty 1 saǵatqa artqa qoiý kerek» - delingen habarlamada.
Búgingi tańda Qazaqstanda UTC+5 jáne UTC+6 eki ýaqyt beldeýi bar. El aýmaǵynyń kóp bóligi (batys oblystardy qospaǵanda) UTC+6 aimaǵynda ornalasqan.
Aita keteiik, Qazaqstanda biryńǵai ýaqyt beldeýin ornatýdy ýaqytty esepteý máseleleri jónindegi jumys tobyna kirgen qazaqstandyq ǵalymdar men sarapshylar usynǵan.
Jumys toby 2023 jyldyń aqpanynda qazaqstandyqtardyń eń qolaily ýaqyt beldeýine kóshý týraly birneshe márte kelip túsken ótinishterine bailanysty qurylǵan. Onyń quramyna ǵylymi institýttardyń, meditsinalyq joǵary oqý oryndarynyń, ortalyq jáne jergilikti memlekettik organdardyń ókilderi, Parlament depýtattary jáne t. b. kirdi.
Ótken jyldan bastap meditsina, fiziologiia, geografiia, metrologiia jáne basqa da túrli salalardy qamtityn jumys tobynyń músheleri Qazaqstanda qolaily ýaqyt beldeýin belgileý máselesin zerttep keledi.
Jumys tobyna qatysýshylar UTC+5 biryńǵai ýaqyt beldeýine kóshý eń durys jáne ońtaily nusqasy ekenin jáne Qazaqstannyń kóptegen aimaqtary tabiǵi ýaqytqa eń jaqyn ýaqytty paidalanatyn bolady degen ortaq pikirge keldi.
Bul rette jumys toby halyqaralyq tájiribeni saralap, álemniń 175 elinde birińǵai ýaqyt beldeýi qoldanylsa, 22 memleket birneshe ýaqyt beldeýinde eken.
Sondai-aq sarapshylar birińǵai ýaqyt beldeýin belgileý elimizdiń ár óńiriniń turǵyndary arasyndaǵy ýaqytsha kedergilerdi joiyp, kólik jáne basqa da kommýnikatsiialardy úilestirýdi jaqsartyp, biznesti júrgizýge, memlekettik organdardyń ózara is-qimylyna oń áserin tigizetinin atap ótti.
Qaýly resmi túrde jariialanyp, 2024 jylǵy 1 naýryzdan bastap qoldanysqa engiziledi.
