Jurtshylyqtyń suranysy men óńirlerdegi epidemiologiialyq jaǵdaiǵa qarai jolaýshylar poiyzdarynyń qozǵalysyn jandandyrý úsh kezeńde iske asyrylady. Bul týraly QR IIDM Kólik komiteti tórǵasynyń orynbasary Jánibek Taijanov málim etti.
«Jalpy, tótenshe jaǵdai kezeńinde 129 jup poiyzdyń qatynasy toqtatyldy. Qazirgi epidemiologiialyq jaǵdaiǵa sáikes, Vedomstvoaralyq komissiianyń otyrysynda el ishinde jolaýshylar poiyzdarynyń qozǵalysyn jandandyrý týraly sheshim qabyldandy. Jolaýshylar poiyzdaryn iske qosý turǵyndar suranysy men óńirlerdegi epidemiologiialyq jaǵdaiǵa bailanysty úsh kezeńde atqarylady», - dedi J.Taijanov Ortalyq kommýnikatsiialar qyzmetinde.
Onyń aitýynsha, 1 maýsymnan bastap 54 jup poiyzdyń qozǵalysy jandanady. Onyń ishinde bes «Talgo», 31 standartty jáne 18 qala mańy poiyzy qamtylmaq.
Osy oraida Nur-Sultannan – Almatyǵa, Óskemenge, Saryaǵashqa, Semeige, Arqalyqqa, Pavlodarǵa, Petropavlǵa, Oralǵa, Jezqazǵanǵa, Qyzylordaǵa qozǵalys ashylady, sondai-aq Almatydan – Shymkentke, Pavlodarǵa, Aqtóbege, Saryaǵashqa, Óskemenge, Jezqazǵanǵa, Oralǵa, Petropavlǵa, Qostanaiǵa baǵdarlar jandanady.
Munymen qosa, Qyzylordadan – Semeige, Kókshetaýǵa, Petropavlǵa qozǵalys ashylsa, Qostanaidan – Qaraǵandyǵa, Arqalyqqa, sondai-aq Qaraǵandy men Jezqazǵanǵa qarai baǵdarlar iske qosylady.
