Qazaqstanda aralas jekpe-jektiń úsh federatsiiasy biriktirilip, Birikken qoǵamdyq birlestigi - «Qazaqstan MMA federatsiiasynyń» prezidenti bolyp Ǵalymjan Esenov sailandy, dep habarlaidy QazAqparat tilshisi.
Naqtyraq aitqanda, Qazaqstannyń aralas jekpe-jek MMA federatsiiasy, Aralas jekpe-jek, pankration jáne grepling Ulttyq federatsiiasy, NOMAD MMA federatsiiasy bir birlestikke - «Qazaqstan MMA federatsiiasyna» birigip otyr.
«Ózderińiz biletindei, biz Qazaqstannyń jaýyngerlik óner qaýymdastyǵyn quryp, onyń basshylyǵyna Kárim Qajymqanuly (Másimov - avt.) kelgen bolatyn. 2022 jyly «SportAccord» halyqaralyq konventsiiasy aiasynda birikken oiyn ótkizý mindeti tur. Muny júzege asyrý úshin bizge jekpe-jek óneri salasyndaǵy ǵana emes, barlyq is-áreketterdi júieleý qajet. Qazirgi tańda biz ulttyq sport túrlerindegi kúshimizdi nyǵaitýdamyz. Shyn mánisinde, ministrlik tarapynan olimpiadalyq sport túrlerine kóbirek kóńil bólinip, jekpe-jek kúres túrlerine jetkilikti nazar aýdarylmai qalǵan bolatyn. Biraq endigi kezekti biz syndarly túrde alǵa jyljýymyz kerek. MMA-nyń joǵary jetistikterge ie ekendigin aita kele jańa maqsattarǵa umtylýymyz kerek», - dedi QR Mádeniet jáne sport ministri Arystanbek Muhamediuly ministrlikte ótken otyrysta.
Ministr óz sózinde taraptar Ǵalymjan Esenovti birikken MMA federatsiiasynyń basshysy laýazymyna maquldaǵanyn aityp ótti.
«Ol - tanymal adam. Qazirgi ýaqytta ol «Almaty marafony» iri sporttyq is-sharanyń uiymdastyrýshysy, kóptegen jyldar boiy shahmat federatsiiasyn basqardy. Aita ketý kerek, shahmatta, ásirese bizdiń qyzdarymyz álemdik reitingte jetekshi oryndarǵa ie. Bul nátijelerdi biz tipti elestete de almaǵan edik. Ǵalymjan Esenov - Kárim Másimov basqaratyn Qazaqstan triatlon federatsiiasynyń vitse-prezidenti. Bizdiń usynysymyzdy qoldaǵany úshin oǵan alǵys aitqym keledi. Sebebi biz júieli túrde alǵa júrýimiz kerek. Onyń zańgerlik, uiymdastyrýshylyq tájiribesi bar», - dedi Arystanbek Muhamediuly.
