13 shildede Qazaqstanda 4375 adamnyń analizinen koronavirýs anyqtaldy. Buǵan deiin bir kúnde osynsha kóp naýqas tirkelmegen. Ótken aptadan beri koronavirýstyń rekordtyq kórsetkishi qatarynan birneshe kún úzdiksiz jańaryp keledi.
Elde indet órship tur. Keibir qalalarda naýqastar syimaǵandyqtan qonaqúi, túrli keshender koronavirýs juqtyrǵandardy qabyldaityn statsionarǵa ainalyp jatyr. Bilik organdary indettiń órshýin koronavirýstyń "delta variantymen" bailanystyrady. Úndistanda anyqtalǵan bul variant Qazaqstanda alǵash ret maýsymnyń sońynda tirkelgen. Jańa variant alǵashqy variantqa qaraǵanda edáýir juqpaly.
13 shildede Nur-Sultanda 1128 adamnan koronavirýs tabylǵan. Indet bastalǵaly beri astanada alǵash ret bir kúnde anyqtalǵan naýqastar myńnan asyp ketip otyr. Almatyda – 640, Qaraǵandy oblysynda – 589, Atyraý oblysynda – 320, Shymkentte – 342, Batys Qazaqstan oblysynda – 187, Aqmola oblysynda – 148, Mańǵystaý oblysynda – 180, Pavlodar oblysynda - 143, Aqtóbe oblysynda 137 naýqas tirkeldi. Qalǵan oblystarda ondaǵan naýqas anyqtalǵan.
Keiingi kúnderi adam óliminiń eń joǵary kórsetkishi de tirkelip jatyr. 12 shildede 59 adam koronavirýstan qaitys bolǵan: 53 adam – koronavirýstan, 6 adam koronavirýs pnevmoniiasynan kóz jumdy dep aitylady.
Resmi málimet boiynsha, Qazaqstanda 2020 jyldyń naýryz aiynan beri 466 792 adamnyń koronavirýs testi oń shyqqan. 4769-y qaitys bolǵan. Buǵan koronavirýs juqtyryp qaitys bolǵan 2300-den astam adamnyń ólimi kirmei qalǵan. Densaýlyq saqtaý ministrliginiń túsindirýinshe, olar "ózge aýrýdan qaitys bolǵan". Biraq DDSU nusqaýlyǵynda oqys jaǵdaidan ózgeniń bárin koronavirýs ólimi statistikasyna qosý qajet dep jazylǵan.
Úkimet byltyr tamyzdan beri PTR testimen rastalmaǵan, biraq aýrý belgileri boiynsha koronavirýsqa uqsaityn pnevmoniia esebin júrgizip keledi. 12 shildege deiin 58 086 adam pnevmoniianyń osy túrine shaldyqqan. 3504-i qaitys bolǵan. Eki kún buryn 167 adam koronavirýs pnevmoniiasyna shaldyqqan. Bilik bul derekti koronavirýstyń negizgi statistikasyna qospai otyr.
Qazir "qyzyl aimaqta" úsh iri qala men 9 oblys tur: Nur-Sultan, Almaty, Shymkent qalalary, Pavlodar, Atyraý, Qaraǵandy, Aqmola, Qostanai, Aqtóbe, Mańǵystaý, Batys Qazaqstan, Soltústik Qazaqstan oblystary. Algoritmge sáikes, "qyzyl aimaqtarda" karantin kúsheiedi. "Sary aimaqta" Almaty oblysy, Jambyl men Qyzylorda oblystary qalǵan. Túrkistan men Shyǵys Qazaqstan oblystary "jasyl aimaqta".
14 shildedegi málimet boiynsha 45 282 adam koronavirýs infektsiiasynan (43 795 KVI+ jáne 1 487 KVI-) emdelip jatyr, olardyń ishinde:
14 698 patsient statsionarda,
30 584 naýqas ambýlatoriialyq deńgeide em alyp jatyr.
KVI+, KVI- shaldyqqandar arasynda:
880 adamnyń jaǵdaiy aýyr,
198 patsienttiń jaǵdaiy óte aýyr,
116 naýqas ÓJJ apparatynda jatyr.
Qazaqstanda aqpan aiynan beri halyqqa koronavirýsqa qarsy vaktsina salyna bastady. Sodan beri 4 mln 601 myń adam vaktsinanyń keminde bir dozasyn alǵan. 2 mln 541 myń adam vaktsinanyń eki dozasyn alǵan.
Djons Hopkins ýniversitetiniń málimetinshe, álemde indet bastalǵaly beri 187 mln 739 myń adam koronavirýsqa shaldyqqan. 4 mln 47 myńy qaitys bolǵan.
Koronavirýs juqtyrǵandardyń aimaqtar boiynsha birkúndik kórsetkishi:
Nur-Sultan qalasynda - 1128,
Almaty qalasynda - 640,
Shymkent qalasynda - 342,
Aqmola oblysynda - 148,
Aqtóbe oblysynda - 137,
Almaty oblysynda - 134,
Atyraý oblysynda - 320,
Shyǵys Qazaqstan oblysynda - 52,
Jambyl oblysynda - 58,
Batys Qazaqstan oblysynda - 187,
Qaraǵandy oblysynda - 589,
Qostanai oblysynda - 98,
Qyzylorda oblysynda - 70,
Mańǵystaý oblysynda - 180,
Pavlodar oblysynda - 143,
Soltústik Qazaqstan oblysynda - 73,
Túrkistan oblysynda - 76.
