2021 jyldan bastap elimizde júrgizýshi kýáligi tolyqtai ózgeredi. Bul týraly IIM ákimshilik politsiia komiteti tóraǵasynyń orynbasary Álibek Keńisbaev habarlady.
Kólik júrgizýshileri jańa bastama qoldanysqa engen ýaqyttan bastap eski qujattaryn jańa tehnikalyq kýálikke aiyrbastaýǵa mindetti.
«Mundai ózgeristerge barý arqyly biz júrgizýshi kýálikterin tirkeý qaýipsizdigin qamtamasyz ete alamyz. Qazir syiymdylyǵy joǵary jady bar jańa úlgidegi chipterdi engizý ústindemiz. Ol kóp aqparat saqtaýǵa qabiletti. Sondai-aq chipke qujat iesiniń biometrikalyq derekterin, iaǵni saýsaq izderin de engizetin bolamyz», - deidi IIM ákimshilik politsiia komiteti tóraǵasynyń orynbasary Á.Keńisbaev.
Onyń aitýynsha, kýálikke engiziletin chip qujattyń artqy bóliginde ornalasady. Sonymen qatar qujattyń túsin de ózgertý josparlanǵan. Jańa kýálik jeke qujatqa uqsas jasalyp, arnaiy shtrihkod engiziletin bolady.
IIM jańa júrgizýshi kýálikterin daiyndaý kezinde sapaly tehnikalyq ónimderdi qoldanýǵa ýáde berdi.
Aita ketsek, buǵan deiin jańa júrgizýshi kýáligi men tehnikalyq tólqujattyń nobaiy usynylǵan edi. Jaýapty organ bul jumystar qaýipsizdikti artyrý maqsatynda jasalyp jatqanyn aitady.
Bundai jańa bastama álem elderiniń tájiribesinde kezdesedi. Máselen, 2005 jyly Germaniia biometriialyq málimetteri bar qujatty engizgen Eýropalyq Odaqtaǵy alǵashqy memleket retinde belgili. Al, Ýkraina biometriialyq qujatty 2013 jyly qoldanysqa engizgen. Qujatqa engizilgen chipte fotodan bólek, tegi, aty, boiy jáne kóziniń túsi men oń jáne sol qoldaǵy saýsaq izderi saqtalǵan.
Eske sala keteiik, «Tsifrlyq Qazaqstan» memlekettik baǵdarlamasy aiasynda Ishki ister organdaryn tsifrlandyrý boiynsha birqatar jumystar júzege asýda. Ministrlikke qarasty salalardyń qyzmetin avtomattandyrý men tsifrlandyrýǵa baǵytalǵan naqty jobalar qolǵa alynǵan.
