Qazaqstanda genetikalyq materialdardy saqtaýǵa arnalǵan biobankter qurý josparlanyp otyr, dep habarlaidy Sputnik Qazaqstan tilshisi.
Búgin májilistiń jalpy otyrysynda keibir zańnamalyq aktilerge densaýlyq saqtaý máseleleri boiynsha túzetýler engizý týraly zań jobasy qaraldy. Otyrys barysynda depýtat Jámila Nurmanbetova zań jobasynda aitylǵan "biobankter" týraly surady.
"Bul mańyzdy norma, Qazaqstanda adamnyń, janýardyń, ósimdikter men mikroorganizmderdiń genetikalyq materialdaryn saqtaý úshin biobankter bolýy kerek. Ekologiialyq jáne antropogendik apat qaterleri ulǵaiyp kele jatqan jaǵdaida bul tipten mańyzdy", — dedi depýtat.
Nurmanbetovanyń aitýynsha, Qazaqstannyń ǵylymi qaýymdastyǵyna biobankter ashý qajettiligi týyndap otyr. Bul baǵytta Asfendiiarov atyndaǵy qazaq ulttyq meditsina ýniversiteti, Nazarbaev Ýniversiteti óz kúshimen alǵashqy qadamdar jasaýda.
"Osy oraida quqyqtyq alańdy qamtamasyz etý jumysyn barynsha jedeldetý kerek", — dedi májilismen.
Bilim jáne ǵylym vitse-ministri Ashat Aimaǵambetov te elge biotúrliliktiń joǵalyp bara jatqan úlgilerin saqtaý úshin arnaiy qoimalar qajet ekenin atap ótti.
"Qazaqstanda derbes meditsina, genetikalyq sekvenirleý, molekýliarly biologiia jaqsy damyp keledi. Bizdiń ǵylymi-zertteý institýttarymyzda kollektsiialar bar, máselen, Ulttyq biotehnologiia ortalyǵynda, genetika institýtynda. Biraq munyń barlyǵy tek kollektsiia ǵana. Bank ázirge joq", — dedi vitse-ministr.
Aimaǵambetov bankterdi eki baǵytta damytý josparlanyp otyrǵanyn aitty.
"Birinshisi, bul biologiialyq bankter. Ekinshisi, meditsinalyq baǵyttaǵy bankter. Eger atalǵan norma qabyldansa, biz tiisti jumys júrgizemiz, — dedi ol.
Májilis depýtattary atalǵan zań jobasyn birinshi oqylymda maquldady.
