Qazaqstanda bilim grantyn taǵaiyndaý konkýrsyna qatysý úshin qujat qabyldaý 16 shilde kúni bastalady, dep habarlaidy "Ult aqparat".
Bilim jáne ǵylym ministrliginiń málimetinshe, qabyldaý elektrondyq formatta júzege asyrylady.
Talapkerler men olardyń ata-anasynyń densaýlyǵyn qorǵaý maqsatynda joǵary oqý oryndarynda virtýaldy qabyldaý komissiialary jumys istep, talapkerlerge beinebailanys arqyly keńes beredi.
Oqýǵa túsýshiler 6 mamyr men 1 shilde aralyǵynda ótken UBT-nyń eki nátijesiniń bireýin konkýrsqa usyna alady.
Ótinish bergen kezde talapkerler attestat, attestatqa qosymshanyń elektrondyq kóshirmelerin jáne elektrondyq qujat nysanyndaǵy kólemi 3×4 tsifrlyq fotosýretti, sondai-aq basqa da qujattardyń kóshirmesin qosa tapsyrýy qajet.
Eger talapker «Altyn belgi» iegeri nemese otansúigishtik jáne belsendi azamattyq ustanymy úshin erekshelik belgisimen marapattalǵan bolsa, onda ol basqa úmitkerlermen baldary teń bolǵan jaǵdaida basym quqyqqa ie bolady.
Olimpiadalar men sport jarystarynyń jeńimpazdary úshin de osyndai artyqshylyqtar qarastyrylǵan.
Talapkerlerdiń mundai jetistikteriniń eskerilýi úshin qujattardy tapsyrý kezinde rastaityn qujattardyń kóshirmelerin tirkeý qajet.
Shet tilin meńgergenin rastaityn halyqaralyq sertifikat bolǵan kezde ótinish berýshi sertifikattyń ataýyn, balyn kórsetedi jáne elektrondyq sertifikatty tirkeidi.
Sonymen qatar biyl bilim berý granttaryn bólý kezinde QR BǴM alǵash ret halyqtyń áleýmettik osal toptaryna kvotalar bóldi.
Endi kópbalaly nemese tolyq emes otbasynan shyqqan balalar, sondai-aq erekshe qajettilikteri bar balalardy tárbielep otyrǵan otbasylardaǵy talapkerlerdiń grant alý múmkindikteri joǵarylai tústi.
Kámeletke tolmaǵan tórt jáne odan kóp bala tárbielep otyrǵan otbasylardaǵy balalar úshin granttardyń jalpy sanynyń 5%-y, keminde úsh jyl tolyq emes otbasy mártebesi bar otbasylardan shyqqan balalarǵa – 1%, I, II toptaǵy múgedek balalardy tárbielep otyrǵan otbasylardan shyqqan túlekterge bilim berý granttarynyń 1%-y kózdelgen.
UBT qorytyndysy boiynsha keminde 65 ball jinaǵan talapkerler ulttyq joǵary oqý oryndaryna túse alady.
«Pedagogikalyq ǵylymdar» – keminde 75 ball, «Densaýlyq saqtaý» − keminde 70 ball, «Aýyl sharýashylyǵy jáne bioresýrstar», «Veterinariia» – keminde 60 ball, basqa joǵary oqý oryndaryna - keminde 50 ball.
Bul rette UBT-nyń árbir páni jáne (nemese) shyǵarmashylyq emtihan boiynsha keminde 5 ball jinaý qajet.
