Atyraý munai óńdeý zaýytyn 24 sáýirde iske qosý josparlanyp otyr. Bul týraly Úkimet otyrysynda biylǵy qańtar-naýryz ailarynyń qorytyndysy boiynsha otyn-energetika keshenin talqylaý kezinde QR Energetika ministri Nurlan Noǵaev málim etti, dep habarlaidy QazAqparat.
«Biylǵy qańtar-naýryz ailarynyń qorytyndysy boiynsha 3 mln tonnadan astam munai ónimderi óndirildi, bul kórsetkish esepti jyldyń qańtar-naýryz ailarynyń josparyna 96,4 paiyzdy qurady. Avtobenzin boiynsha kórsetkish 1,1 mln tonnaǵa jetti, iaǵni jospar 94,5 paiyzǵa oryndaldy. Óndirilgen dizel otynynyń kólemi 1 mln tonna, bul esepti ailardyń josparyna 89,7 paiyzdy qurady», - dedi ministr.
Onyń aitýynsha, aǵymdaǵy jylǵy 9 sáýirdegi jaǵdai boiynsha munai ónimderi qorynyń deńgeii jetkilikti, iaǵni 25 kúnge jetetin benzin, 27 kúnge jetetin dizel otynynyń qory bar.
«Atalǵan kórsetkishterdiń tómendeý sebepteri aǵymdaǵy jyldyń qańtar aiynda Atyraý munai óńdeý zaýytynda elektr energiiasyn jetkizýde paida bolǵan irkiliske bailanysty. Bul tehnologiialyq qondyrǵylardyń (katalitikalyq kreking jáne onymen bailanysty qondyrǵylar, katalitikalyq riforming, benzin men dizeldi gidrotazalaý, kúkirt óndirý qondyrǵylarynyń) avariialyq toqtaýyna ákeldi, sonyń saldarynan jóndeý jáne qalpyna keltirý jumystaryn júrgizý qajettiligi týyndady», - dedi N. Noǵaev.
Osy oraida alǵashqy jospar boiynsha jóndeý jumystaryn 4 sáýirde aiaqtap, zaýytty tolyq qýatyna shyǵarý 10 sáýirge josparlanǵan bolatyn. Aqaýlardy anyqtaý barysynda qosymsha jóndeý sharalaryn qabyldaý qajet ekeni anyqtaldy. Atalǵandardy eskere otyryp, Atyraý munai óńdeý zaýytyn 24 sáýirde iske qosý josparlanyp otyr.
«Atyraý munai óńdeý zaýytynyń qondyrǵylaryn jóndeý barysynda elimizde munai ónimderiniń tapshylyǵyn boldyrmaý maqsatynda Energetika ministrligi «QazMunaiGaz» UQ-men birlesip, Shymkent munai óńdeý zaýytynda 25 naýryz – 10 mamyr arasynda josparlanǵan kúrdeli jóndeý jumystarynyń merzimderin 1 mamyr-10 maýsymǵa aýystyrý týraly sheshim qabyldady», - dedi ministr.
