Jelide «Qazaqstanda barlyq aqsha aýdarymdaryna salyq salynady» degen feik aqparat tarady, dep habarlaidy stopfake.kz saity.
Jaqyn arada banktik mobildi qosymshalar arqyly barlyq aqsha aýdarymdaryna salyq salynady degen habarlamalar qazaqstandyqtardyń alańdaýshylyǵyn týdyrdy. Bul týraly tanymal RasTime YouTube arnasynyń júrgizýshisi málimdedi.
Ol jeke tulǵalar arnalǵan aqsha aýdarymdaryna salyq salý júiesin ázirleýge shaqyrǵan QR premer-ministriniń birinshi orynbasary Álihan Smaiylovtyń sózine súienedi.
Rolik avtorynyń aitýynsha, salyq aýdarym somasy men maqsatyna qaramastan alynady.
QR Qarjy ministrligi bul aqparatty joqqa shyǵardy.
«Árbir satyp alý (kartamen tólengen – avt.), dostaryna nemese týystaryna jasaǵan aqsha aýdarymy úshin salyq tóleýge týra keletini týraly aqparat shyndyqqa sáikes kelmeidi. Jeke tulǵalardyń birde-bir aqsha aýdarymyna salyq salynbaidy jáne mundai salyqty engizý josparda joq. Bul videoda jalǵan aqparat usynylǵan « , – dep habarlady vedomstvodan.
Álihan Smaiylovtyń kásipkerlerdiń qyzmetin nemese satylǵan taýarlar úshin aqsha aýdarymdaryn salyq salýmen qamtý qajettigi týraly aitqany ras. Bul shara tek zańdy tulǵalarǵa ǵana qatysty bolady.
Barshańyzdy tek resmi aqparatqa ǵana senýge shaqyramyz! Jańalyqtyń shynaiylyǵyn bizdiń portaldyń kómegimen tekserýge bolady. Ózińizdi qyzyqtyrǵan aqparatty t.me/stopfake_kz Telegram-arnasyna nemese +7 707 739 5599 WhatsApp nómirine jiberińiz.
