Foto: Gov.kz
Elimizde Balalardyń ál-aýqaty indeksiniń qorytyndylary aiasynda aýqymdy áleýmettik zertteý júrgizildi. Saýalnamaǵa balalar, ata-analar jáne pedagogter qatysty, dep habarlaidy Ult.kz.
Zertteý nátijelerine sáikes, balalardyń quqyqtyq qorǵalýynyń ortasha deńgeii 90,3%-dy qurady. Bul olardyń óz quqyqtary týraly habardarlyǵy joǵary ekenin jáne ózderin qorǵaý tetikterin qoldana alatynyn kórsetedi.
Aldyńǵy qatardan Qostanai oblysy (94,5%), Mańǵystaý oblysy (93,5%) jáne Qyzylorda oblysy (93,1%) kórindi.
Mańyzdy kórsetkishterdiń biri – jasóspirimderdiń óz ómirine qanaǵattaný deńgeii. Orta eseppen 10–18 jastaǵy balalardyń 85%-y óziniń áleýmettik jáne psihologiialyq jaǵdaiyn oń baǵalaǵan. Bul baǵytta eń joǵary nátije Qostanai oblysynda (90,1%), Shymkent qalasynda (88,7%) jáne Qyzylorda oblysynda (88,5%) tirkeldi.
Zertteý barysynda otbasy ishindegi senim deńgeiine erekshe kóńil bólindi. Nátijesinde jasóspirimderdiń 90,4%-y ata-anasymen ashyq sóilesip, oi-pikirin bólise alatynyn kórsetti. Eń joǵary kórsetkishter Ulytaý oblysynda (97,5%), Astana qalasynda (95,3%) jáne Qostanai oblysynda (94,7%) baiqaldy.
«Balalar ál-aýqaty indeksi – balanyń densaýlyǵy, bilimi, otbasy jáne áleýmettik ortasyn qamtityn mańyzdy kórsetkish. Bizdiń maqsatymyz – eń aldymen balalardyń óz únin estý. Zertteý nátijeleri olardyń ózderin qaýipsiz sezinetinin, ata-anasymen jaqsy qarym-qatynasyn jáne bolashaǵyna senimmen qaraitynyn kórsetip otyr», – dedi QR Oqý-aǵartý ministrligi Balalardyń quqyqtaryn qorǵaý komitetiniń tóraiymy Nasymjan Ospanova.
Aita keteiik, 2024 jyldyń qorytyndysy boiynsha Qazaqstanda Balalardyń ál-aýqaty indeksi turaqty ósim kórsetip, ortasha respýblikalyq kórsetkish 2,5 pýnktke artyp, 58,6 baldy qurady.
