Aýtistik spektr aýytqýy bar balalardy anyqtaý deńgeii aitarlyq ósti. Bul týraly Búkilálemdik aýtizm máselesi týraly aqparat taratý kúnine arnalǵan brifingide QR DSM Respýblikalyq psihikalyq densaýlyq ǵylymi-praktikalyq ortalyǵynyń bas direktory Nikolai Negai málim etti, dep habarlaidy QazAqparat.
«Dúniejúzilik densaýlyq saqtaý uiymynyń derekteri boiynsha 160 balanyń biri nemese balalardyń 0,6 paiyzy aýtistik spektr aýytqýynan zardap shegedi (bul Soltústik Amerika jáne Eýropa óńirleri elderi boiynsha ortasha mándi bildiredi). Respýblikada sońǵy 13 jylda aýtistik spektr buzylǵan (ASB) balalardy anyqtaý deńgeii aitarlyq ósti. 2008 jyldaǵy 37-den 2020 jylda 756-ǵa deiin (100 myń adamǵa shaqqanda 12,7) ósken. Ásirese, bul jaǵdai sońǵy jyldary baiqalyp otyr. Óitkeni qazir balalar erte skriningten ótedi, iaǵni erte diagnoz qoiylady jáne mamandar arnaiy oqytylyp jatyr, alǵashqy meditsinalyq-sanitarlyq kómek qoljetimdi», - dedi Nikolai Negai Ortalyq kommýnikatsiialar qyzmetinde.
Sonymen qatar ol qazirgi kezdegi problema toqtaldy. Bul turǵyda balanyń jaǵdaiyn durys baǵalamaý, kesh jasalatyn diagnostika teris áser etedi. Sondyqtan osy baǵyttaǵy qadamdardy jetildirý men jańa tehnologiialardy engizý qajettigi sezilip otyr.
Mamandar aýtizm balada 3 jasqa deiin baiqalatynyn aitty. Damýda aýytqýshylyq bolady, saldarynan bala áleýmettik ortamen qarym-qatynas ornata almaidy.
Budan buryn habarlanǵandai, QR Densaýlyq saqtaý ministrliginiń Ana men balanyń densaýlyǵyn qorǵaý departamenti direktorynyń orynbasary Oljas Ysqaqov balalar psihiatriiasy mamandyǵy boiynsha grant sany kóbeigenin aitty.
Aita keteiik, sáýirdiń 2-si Búkilálemdik aýtizm máselesi týraly aqparat taratý kúni retinde belgilengen. BUU Bas Assambleiasynyń 2007 jylǵy jeltoqsannyń 18-indegi arnaiy qararymen bekitilgen. 2008 jyldan bastap jyl saiyn sáýirdiń 2-sinde atap ótiledi. Bul Búkilálemdik kún Katar memleketiniń usynysy boiynsha belgilendi, muny Birikken Ulttar Uiymynyń Bas Hatshysy 2008 jylǵy joldaýynda atap ótti. Bas Assambleianyń qararynda, eń aldymen, balalardyń aýtizm máselesine kóńil bólindi, sondai-aq diagnozdy neǵurlym erte qoiý jáne tiisti tekserý júrgizý atap kórsetilgen.
