Qazaqstanda mektepke deiingi uiymdarǵa egilmegen balalardy kirgizýge tyiym salynbaq. Bul týraly QR Densaýlyq saqtaý ministri Eljan Birtanov aitty, dep habarlaidy QazAqparat.
«Kodeks jobasy halyqtyń densaýlyǵyn nyǵaitýǵa baǵyttalǵan normalardy kózdeidi. Atap aitqanda: psihikalyq densaýlyqty qorǵaý, psihikaǵa belsendi áser etetin zattarmen, sondai-aq qumar oiyndarǵa bailanysty týyndaǵan sýitsidtik minez-qulyqtyń jáne qaýiptiń profilaktikasy boiynsha normalar; bilim berý jáne túsindirý is-sharalaryn ótkizetin tárbielenýshiler men oqýshylardyń densaýlyǵyn saqtaýǵa ata-analar men pedagogtardy tartý boiynsha normalar; jasóspirimder men jastarǵa qupiia keshendi kómek berý jónindegi normalar reglamentteldi», - dedi ol Májiliste «Halyq densaýlyǵy jáne densaýlyq saqtaý júiesi týraly» kodeks jobasynyń jańa redaktsiiasyn tanystyrý barysynda.
Sondai-aq, ministrdiń atap ótýinshe, aýrýdyń profilaktikasyna baǵyttalǵan jańa erejeleri kózdeledi. Atap aitqanda, azamattardyń óz densaýlyǵyna mindetti túrde qamqorlyq jasaýy, onyń ishinde skriningten mindetti ótýi jáne profilaktikalyq egýlerdi alýy, qorshaǵan ortanyń halyq densaýlyǵyna áserin, onyń ishinde shý men atmosferalyq aýanyń áserin retteý, mektepke deiingi uiymdarǵa egilmegen balalardy jiberýdi shekteý qarastyrylady.
«Azamattardyń, jumys berýshiler men memlekettiń qoǵamdyq densaýlyqty saqtaýǵa, infektsiialyq jáne infektsiialyq emes juqpaly aýrýlardyń profilaktikasyna ortaq jaýapkershiligi kúsheitildi. Atap aitqanda: vedomstvoaralyq ózara is-qimyl róli, úkimettik emes uiymdar róli naqtylandy; skriningterden ótý úshin mindetti áleýmettik demalystar berý belgilendi; júrgizýshi quqyǵyn alý kezinde alǵashqy kómek kórsetý daǵdylaryna oqytý mindeti reglamenttelgen», - dedi E.Birtanov.
Ministrdiń sózine qaraǵanda, atalǵan túzetýlerdi qabyldaý nátijesinde sýitsidtik áreketter men temeki ónimderin, alkogoldik ishimdikterdi tutyný sanynyń tómendeýi kútiledi. Qoǵamdyq densaýlyqty saqtaý nyǵaia túsedi. Ult densaýlyǵy, onyń ishinde jastardyń reprodýktivti densaýlyǵynyń profilaktikasy arqyly nyǵaitylady. Azamattardyń óz densaýlyǵy úshin ortaq jaýapkershiligi kúsheie túsedi. Qorshaǵan ortanyń halyq densaýlyǵyna teris áserin tejeý qamtamasyz etiledi. Qyzmetkerdiń erte kezeńinde aýrýlarynyń diagnostikasy qamtamasyz etiledi. Jol-kólik apaty kezindegi ólim tómendeidi.
