Qazaqstanda baǵaly metaldyń zańsyz ainalymy baǵytynda jaýapkershilikti kúsheitý kerek. Bul týraly Májilistiń jalpy otyrysynda «Eýraziialyq ekonomikalyq odaq sheńberinde baǵaly metaldarmen jáne asyl tastarmen operatsiialardy júzege asyrý erekshelikteri týraly kelisimdi ratifikatsiialaý týraly» zań jobasyn talqylaý kezinde aityldy, dep habarlaidy "Ult aqparat".
«2016 jyldan beri ministrlik turaqty negizde baǵaly metaldar ainalymy, ony zańsyz shyǵarý men qai óńdeýge qatysty jańapkershilikti kúsheitýge bastamashylyq etti. 2018 jyly Aqmola oblysyndaǵy kásiporyndarda asyl metaldardy jymqyrý jaǵdaiy boldy. Biz sol kezde de bul máseleni kótergen edik», - dedi QR Indýstriia jáne infraqurylymdyq damý ministri Beibit Atamqulov.
Óz kezeginde Májilis tóraǵasy Nurlan Nyǵmatýlin osy qylmys úshin jaýapkershilik kúsheitilgen elderdiń tájiribesin aitty.
«EAEO-nyń elderinde baǵaly metaldardyń zańsyz ainalymy úshin qylmystyq jaýapkershilik qarastyrylǵan. Máselen, Reseide baǵaly metaldyń zańsyz ainalymyna 3 jylǵa deiin bas bostandyǵynan aiyrý qarastyrylǵan. Osy áreketter iri kólemde nemese uiymdasqan qylmys túrinde jasalsa, 7 jylǵa deiin bas bostandyǵynan aiyrý jazasy beriledi. Osyǵan uqsas bap Belarýs zańnamasynda qarastyrylǵan. Al bizde baǵaly metaldyń zańsyz ainalymy úshin ákimshilik jaýapkershilik eskerilgen. Elimizde baǵaly metaldy urlaý men onyń zańsyz ainalymy jyl saiyn artyp keledi», - dedi Nyǵmatýlin.
Osy oraida ol qylmyskerlerdi ákimshilik qamaýǵa alý nemese 17 AEK somasyndaǵy aiyppul toqtata almai jatqanyn atap ótti. Sebebi altyndy zańsyz óndirý, satyp alý, zańsyz saýdalaý tabysty bolyp tur.
«Ishki ister ministrligi de, Bas prokýratýra da jaýapkershilikti kúsheitýge qarsy emes. Bul rette ministrlik (QR IIDM) qai tarapty qoldap tur degen saýal týyndap otyr. Nege qajetti qadamdar jasalmaǵan? Ókiletti organ retinde Indýstriia jáne infraqurylymdyq damý ministrligi baǵaly metaldyń zańsyz ainalymy úshin jazany kúsheitýge birinshi kezekte múddeli bolýy tiis. Sizderge bul problemany aityp qana qoimai, tiisti usynys engizý kerek», - dedi Májilis tóraǵasy.
