Qazaqstanda jubaiynyń kelisiminsiz jeke tulǵalarǵa nesie berýge tyiym salý usynyldy, dep habarlaidy "Ult aqparat".
Muny qarjy naryǵyn retteý jáne damytý agenttigi tóraǵasynyń birinshi orynbasary Nurlan Ábdirahmanov nesie berý týraly zańnamaǵa ózgertýler men tolyqtyrýlar engizýdi qarastyrý barysynda málimdedi.
"Qazaqstan azamattarynyń kóbiniń qaryz alý sebebi – qumar oiynǵa táýeldilik. Adamdar kazinolarǵa bás tigip, tabys tabýǵa beiim. Keibir jaǵdailarda olar bank nesielerin de paidalanady. Erli-zaiyptynyń biri nesie alady da, bolashaqta bul nesie otbasylyq biýdjetke aýyrtpalyq túsiretin jaǵdailar bar", – dedi Ábdirahmanov májiliste.
Onyń aitýynsha, mundai qajetsiz nesielerdiń sanyn azaitý úshin jubaiynyń kelisimimen jeke tulǵaǵa banktik nesie berý talaby qoldaý taýyp otyr.
"Agenttik erejelerinde jubaiynyń kelisimin alý qajet nesieniń eń tómengi somasyn anyqtaý usynylady", – dedi Ábdirahmanov.
Depýtattar bankter men mikroqarjy uiymdarynyń qaryz alýshynyń jubaiynyń jazbasha kelisimimen ǵana nesie berý týraly usynysty biraýyzdan qoldady.
Bul usynysty ádilet ministrligi de qoldady.
