«QR Ákimshilik quqyq buzýshylyq týraly kodeksine ózgerister men tolyqtyrýlar engizý týraly» zań jobasy aiasynda aiyppul mólsherin azaitý qarastyrylyp otyr. Bul týraly Parlament Májilisiniń jalpy otyrysynda QR Ádilet ministri Marat Beketaev málim etti, dep habarlaidy QazAqparat tilshisi.
«Ádilet ministrligi múddeli memlekettik organdarmen birlesip, quqyq qoldaný tájiribesi negizinde ákimshilik quqyq buzýshylyq týraly zańnamany odan ári jetildirý, sonyń ishinde ony izgilendirý jáne ásire qatańdyǵyn tómendetý boiynsha máselelerdi pysyqtady», - dep toqtaldy M. Beketaev.
Osy oraida, ákimshilik quqyq buzýshylyqtardyń keibir quramdaryn alyp tastaý eskerilip otyr.
«Retteýshi organdardyń ustanymyna sáikes, ákimshilik quqyq buzýshylyqtardyń keibir quramdaryn azamattyq nemese tártiptik is júrgizý arqyly qaraýǵa bolady. Sondai-aq, qazirgi ýaqytta, memlekettik organdardyń baqylaý-qadaǵalaý fýnktsiialaryn ońtailandyrý jáne olardy avtomattandyrý siiaqty is-sharalar oryndalýda. Bul rette zań jobasymen ákimshilik quqyq buzýshylyqtardyń otyz eki quramdaryn alyp tastaý usynylady», - dedi ministr.
Budan bólek, ákimshilik quqyq buzýshylyqtardyń jekelegen sanktsiialaryn jeńildetý jáne tómendetý qarastyrylyp otyr.
«Ákimshilik quqyq buzýshylyq sanktsiialaryna júrgizgen taldaý olardy ákimshilik jaýapkershilikti odan ári izgilendirý aiasynda jeńildetýge jáne tómendetýge múmkindik bar ekenin kórsetti. Memlekettik organdardyń jáne úkimettik emes uiymdardyń usynystary negizinde, sondai-aq taldaý men statistikalyq derekterdi eskere otyryp, zań jobasymen qyryq tórt quram boiynsha aiyppul mólsherin azaitý, on quram boiynsha ásire qatańdyqty tómendetý, alty quram boiynsha eskertý engizý usynylady», - dedi Marat Beketaev.
