Qazaqstan strategiialyq zertteýler institýtynyń áleýmettik-saiasi zertteýler bóliminiń basshysy Alýa Joldybalina Qazaqstanda aimaqtyq zertteý ortalyqtaryn ashý kerektigin aitady, dep habarlaidy QazAqparat.
«Jalpy búgingi talqylaý barysynda mynadai úsh máselege toqtala ketkim kelip tur. Birinshiden búgin de biz nazar aýdarmaityn bir másele bar. Ol – halyqtyń shaǵymdary men suraýlary. Qazir halyq belsendi túrde barlyq memlekettik organǵa shaǵym jazady. Búkil Qazaqstan boiynsha jergilikti jerge túsetin, quzyrly organdar men Parlamentke, barlyq memlekettik organǵa túsetin shaǵymdardy jinap, taldaýǵa tyrystyq. Ol shaǵymdar ainalyp kelgende aimaqtardaǵy ózekti máselelerden habar beredi», - dedi sarapshy Eýraziialyq integratsiia institýtyndaǵy «Ulttyq qoǵamdyq senim keńesi: taldamalyq zerdeleý» atty saraptamalyq baiandamanyń tanystyrylymynda.
Sarapshy keiingi bes jylda azamattardan túsken shaǵymdar statistikasy neni kórsetetinin baian etti.
«Bizde keiingi bes jylda Bas prokýratýraǵa, Joǵarǵy sotqa, Prezident Ákimshiligine, Adam quqyqtary jónindegi ombýdsmenge túsetin shaǵymdar kóbeiip keledi. Al jergilikti jerde túsetin aryzdar azaiyp ketken. Ol neni bildiredi? Iaǵni jergilikti jerde máselesin sheshe almaǵan azamat «joǵary» jaqqa barady. Mysaly Adam quqyqtary jónindegi ombýdsmenmen sóileskenimizde ol kisi bizge «azamattar meniń quzyryma kirmeitin máselelermen júginedi» deidi. Iaǵni bul rette problemalardyń qordalanyp qalǵanyn baiqaimyz. Sondyqtan meniń oiymsha, Ulttyq keńeske kómek retinde barlyq shaǵymdardy jinap, ózekti máselelerdiń ierarhiiasyn jasap, aimaqtarda Prezident Ákimshiliginiń aimaqtyq bir bólimshesin ashsaq jaqsy bolar edi», - deidi sarapshy.
Alýa Joldybalina sondai-aq Qazaqstanda ókinishke qarai qazirgi tańda aimaqtyq zertteý ortalyqtary joqtyǵyn alǵa tartty.
«Qazaqstanda oblystar men iri qalalar bar. Oblystardaǵy bir problema ekinshisine uqsamaýy múmkin. Sondyqtan árbir aimaq boiynsha áleýmettik, ekonomikalyq ári ideologiialyq, keshendi zertteý júrgizý – kún tártibindegi ózekti másele. Iaǵni biz aimaqtardyń báriniń tolyq sipattamasyn bermeiinshe qoǵamdaǵy máselelerdi túsinbeýimiz yqtimal», - dedi ol.
