2021 jylǵy 1 shildeden bastap Qazaqstanda aiaq kiimdi mindetti tsifrlyq tańbalaýdy engizý josparlanyp otyr. Bul týraly Tsifrlyq ekonomikany damytý ortalyǵy baspasóz qyzmetinen málim boldy, dep habarlaidy "Ult aqparat".
Bul degenimiz, barlyq aiaq kiim óndirýshiler men importtaýshylar óz taýarlaryn arnaiy eki ólshemdi Data Matrix kodymen tańbalaýy kerek. Barlyq normativtik-quqyqtyq aktiler bekitilgennen keiin, álemniń basqa elderinen, onyń ishinde EAEO-dan tsifrlyq tańbalaýsyz taýar Qazaqstan shekarasynan óte almaidy. Tańbalanbaǵan aiaq kiimniń qaldyqtaryn jyl boiyna satýǵa bolady.
Jańa engizilim Qazaqstannyń aiaq kiim naryǵynyń barlyq qatysýshylaryna – óndirýshilerge, importtaýshylarǵa jáne bólshek saýda dúkenderine qatysty bolady. Atap aitqanda, aiaq kiim ainalymyna qatysýshylar taýarlardy tańbalaý men olardyń qadaǵalanýynyń aqparattyq júiesinde (TTQAJ) tirkelýge, sondai-aq óz taýarlaryn Ulttyq katalogta tirkeýge tiis bolady. Tańbalaý kodtary avtomatty túrde TTQAJ-da jasalady. Sodan keiin olardy Data Matrix-ke túrlendirýge jáne basyp shyǵarý úshin júkteýge bolady.
«Qazir Qazaqstanda aiaq kiimdi mindetti tsifrlyq tańbalaýdy engizý úshin normativtik-quqyqtyq bazany daiyndaý protsedýralary ótip jatyr. Biraq biz importtaýshylarǵa, óndirýshilerge jáne bólshek satýshylarǵa naryqta jumys isteýdiń jańa erejelerine qazir daiyndalýǵa keńes beremiz. Biznes tsifrlyq tańbalaý protsesin neǵurlym erterek bastasa, barlyq kezeńderdi zertteýge onyń kóp ýaqyty bolady», - dedi Tsifrlyq ekonomikany damytý ortalyǵynyń bas direktory Bikesh Qurmanǵalieva.
Importtaýshylar taýarǵa Data Matrix tsifrlyq tańbalaý kodyn taýar memlekettik kedendik rásimderden ótkenge deiin tańbalanýy qajet. Ónimdi basqa eldegi óndiriste nemese Qazaqstan Respýblikasynyń aýmaǵyndaǵy keden qoimasynda tańbalaýǵa bolady.
Data Matrix kody tikelei aiaq kiimge, sondai-aq taýarlyq japsyrmaǵa nemese tutynýshy qaptamasyna engizilýi múmkin.
Tsifrlyq tańbalaý naryqty sapasyz jáne Qazaqstan aýmaǵyna zańsyz ákelingen ónimderden tazartýǵa kómektesedi, sondai-aq otandyq óndirýshilerdi damytýǵa serpin beredi. Tutynýshy da óz paidasyn alady. Birinshiden, jańa tsifrlyq belgi satyp alýshy úshin ónimniń zańdylyǵy týraly belgi bolady. Ekinshiden, tutynýshy Naqty Onim arnaiy mobildi qosymshasy arqyly Data Matrix kodyn skanerlep, taýar týraly tolyq aqparat ala alady.
Esterińizge sala keteiik, Qazaqstan Respýblikasynda temeki ónimderin mindetti tsifrlyq tańbalaý 2020 jylǵy 1 qazannan bastap engizildi. 2022 jyly farmatsevtikalyq preparattardy, alkogol ónimderin jáne jeńil ónerkásip taýarlaryn mindetti tsifrlyq tańbalaýdy iske qosý josparlanyp otyr.
