Búgin Úkimet otyrysynda Aýyl sharýashylyǵy ministri Saparhan Omarov fermerlerdiń tehnikasy eskirgenin aitty, dep habarlaidy QazAqparat.
«Jalpy respýblika boiynsha kóktemgi dala jumystary keshenin júrgizý úshin 142 myń traktor, 4,3 myń ónimdiligi joǵary egis kesheni, 73 myń tuqymsepkish, 221 myń topyraq óńdeý quraly jumyldyryldy. Sonymen qatar, qolda bar 142 myń traktordyń 75%-ynyń amortizatsiialyq paidalaný merzimi 15 jyldan asqan, osy óndiristik tsiklge shamamen 35 myń traktor (25%) tolyqqandy qatysty dep aitýǵa bolady, bul traktor parkiniń tozýy joǵary deńgeide ekenin kórsetedi»,- dedi S. Omarov.
Onyń aitýynsha, aýyl sharýashylyǵy tehnikasy parkiniń jańartylýyna júrgizilgen taldaý óńirlerdiń jańartýdyń eń tómengi tehnologiialyq deńgeii – 6%-ǵa qol jetkize almai otyrǵanyn kórsetedi. Joǵary jańartý deńgeii Aqtóbe, Qyzylorda jáne Qaraǵandy oblystarynda, tómen jańartý deńgeii Almaty, Batys Qazaqstan jáne Atyraý oblystarynda baiqaldy.
«2020 jyly jańartýdyń ortasha deńgeii 4,1%-dy qurady. Jańartý qarqynyn jedeldetý úshin oblystar ákimdikteri respýblikalyq biýdjetten basqa, jergilikti biýdjetten de qarajat tartyp, aýyl sharýashylyǵy tehnikasynyń basym túrlerin, onyń ishinde kooperativtik birlestikter úshin satyp alýdy sýbsidiialaý normativterin qosymsha ulǵaitýy qajet. Mundai normativtik quqyq investitsiialyq sýbsidiialaý qaǵidalarynda kózdelgen. Biyl fermerlerdiń otandyq tehnikaǵa degen suranysy artqany baiqalady. Indýstriia jáne infraqurylymdyq damý ministrliginiń derekterine sáikes, mamyr aiyndaǵy jai-kúi boiynsha otandyq kásiporyndar 1,6 myńnan astam traktor jasap shyǵardy, bul 2020 jyldyń deńgeiinen 3,2 ese kóp», - dedi ministr.
Onyń sózine qaraǵanda, investitsiialyq sýbsidiialardy bastapqy jarna retinde paidalaný, sondai-aq otandyq tehnikaǵa kredit berýdiń jeńildikti baǵdarlamalary satyp alý qabiletine oń yqpal etýde. Bul rette, traktorlardyń keibir modelderi boiynsha suranys óndiristen de joǵary. Otanymyzda qurastyrylatyn «Kirovets», «Versatail», «Belarýs», «Lovol» traktorlary fermerler arasynda úlken suranysqa ie, olar alys shet elderdiń osyndai synyptaǵy tehnikasymen salystyrǵanda edáýir arzan.
«Sonymen qatar, astyq jinaý naýqanyna «Akros» jáne «Essil» sekildi kombaindardyń tanymal modelderi óndirisiniń ulǵaiýyn, sondai-aq Soltústik Qazaqstan oblysynda «KLAAS» kombaindary óndirisiniń bastalýyn kútýdemiz. Satyp alý serpinin jedeldetýge biylǵy mamyr aiynyń basynda ministrlik bekitken investitsiialyq sýbsidiia normativin arttyrý yqpal etetin bolady», - dedi ol.
2021 jyldyń 5 aiynda respýblika boiynsha 140,8 mlrd teńgege 8,7 myń aýyl sharýashylyǵy tehnikasy satyp alyndy.
