Elimizde qystygúni aýa raiynyń qolaisyzdyǵy men eskertýge qaramastan jolǵa shyǵatyn azamattardy ákimshilik jaýapqa tartý qaralyp jatyr. Bul týraly Nur-Sultan qalasy tótenshe jaǵdailar departamenti tótenshe jaǵdaidy joiý basqarmasynyń basshysy Eldor Raiymbekov málim etti, dep habarlaidy QazAqparat tilshisi.
«Búginde «Qazavtojol» jáne «Qazavtodor» mekemelerimen birlesip qystygúni aýa raiynyń qolaisyzdyǵy týraly eskertý, habarlandyrýǵa qulaq aspai jolǵa shyǵyp ketetin turǵyndardy jaýap tartý jaǵyn qarastyryp jatyrmyz. Aýa raiynyń qolaisyzdyǵyna jáne eskertýge qaramastan jolǵa shyǵyp ketetinder bar. Saldarynan adamdar tótenshe jaǵdaiǵa tap bolyp jatady. Iaǵni, joldy tazalaý qyzmetiniń mamandary qarly-borandy kúni jolǵa shyqqan kólik ieleri týraly politsiiaǵa habarlaidy, odan ári tártip saqshylary iske kirisip, jolaýshyny ákimshilik jaýapkershilikke tartady. Bul jerde basty másele - adamnyń qaýipsizdigi», - deidi Eldor Raiymbekov.
Onyń aitýynsha, atalǵan sharany «Qazavtojol», «Qazavtodor», politsiia jáne tótenshe jaǵdai qyzmeti birlesip atqarady.
«Negizi jolda júrý zańynda bul másele qaralǵan. Iaǵni jol qozǵalysy erejesin buzý bolyp tabylady. Sondyqtan da eskertýdi elemeitin jolaýshylardy jaýapkershilikke tartý sharasy qolǵa alynyp jatyr. Eskeretin jait, ákimshilik jaýapkershilik aýa raiynyń qolaisyzdyǵy týraly habarlandyrý jáne tótenshe jaǵdai qyzmetkeri men politsiianyń eskertýine qaramastan jolǵa shyqqandarǵa ǵana qatysty», - deidi ol.
