QR Ekologiia, geologiia jáne tabiǵi resýrstar ministri Maǵzum Myrzaǵaliev Úkimet otyrysynda óńirlerdegi ekologiialyq problemalardy sheshý sharalaryn baiandady, dep habarlaidy QazAqparat.
Ministrdiń aitýynsha, qazirgi ýaqytta óńirlerdiń negizgi ekologiialyq problemalary: aýanyń, jer ústi sýlarynyń lastanýy jáne qaldyqtarmen jumys isteýdiń jetilmegen júiesi bolyp otyr.
«Atmosferalyq aýanyń ekologiialyq monitoringine sáikes, ótken jyldyń qorytyndysy boiynsha 45 ónerkásiptik qala men megapolistiń ishinen 10 qala atmosferalyq aýanyń joǵary lastaný deńgeiine jatady. Lastaýshy zattardyń shyǵaryndylarynyń jalpy kólemi 2,5 million tonnany qurady. Jerústi sýlarynyń lastanýynyń negizgi sebepteriniń biri – eskirgen káriztazartý nysandary. Byltyr respýblika boiynsha lastaýshy zattar tógindileriniń jalpy kólemi 1,1 million tonnany qurady», - dedi Maǵzum Myrzaǵaliev.
Sonymen birge, óndiris jáne tutyný qaldyqtarymen jumys isteý problemasy da sheshilmei tur. Atap aitqanda qatty turmystyq qaldyqtar poligondarynyń sanitarlyq jáne ekologiialyq talaptarǵa sáikes kelmeýi, olardy óńdeý deńgeiiniń tómendigi jáne apatty úiindiler bar.
Ministrlik «Halyq únine qulaq asatyn memleket» tujyrymdamasyn iske asyrý aiasynda ekologiialyq problemalar men olardy jurtshylyqpen, ásirese, barlyq óńirlerdegi eko-belsendilermen talqylap, sheshý joldaryn qarastyrǵan.
«Jurtshylyqpen, ákimdiktermen jáne tabiǵat paidalanýshylarmen birlesip 17 jol kartasy ázirlendi. Barlyǵy 485 shara qarastyrylǵan. 2021 jyly 95 shara ótkizý josparlanǵan. Biylǵy birinshi toqsanda jalpy 70 shara kózdelgen bolatyn. Onyń ishinde 42 shara oryndalyp, 28-i oryndalmaǵan.
2025 jylǵa qarai Jol kartalaryn iske asyrý 10 qalada atmosferanyń lastaný indeksin joǵarydan ortasha deńgeige tómendetýge múmkindik beredi. Bul atmosferalyq aýanyń jai-kúiin jaqsartýǵa yqpal etedi. Odan basqa, 7 káriztazartý nysandary men 24 jańa poligon salynady. 12 káriztazartý nysandary qaita jańǵyrtylady. Sondai-aq tarihi lastanǵan jerlerdi qalpyna keltirý jáne joiý jumystary júrgiziledi», - dep túsindirdi Ekologiia ministri.
