Elde bar astyq kólemi halyqty qamtamasyz etý, tuqym men jemshóp qoryn qalyptastyrý úshin jetkilikti. Bul týraly Aýyl sharýashylyǵy ministri Saparhan Omarov málim etti, dep habarlaidy "Ult aqparat".
«Egin jinaý qorytyndylary boiynsha 17,4 mln tonna astyq bastyryldy, bul 2018 jyldyń deńgeiinen 2,9 mln tonnaǵa nemese 14 paiyzǵa az. Búgingi kúni respýblika boiynsha qolda 10,2 mln tonna astyq, onyń ishinde 7,8 mln tonna bidai bar», - dedi ministr Parlament Májilisindegi Úkimet saǵatynda.
Onyń sózine qaraǵanda, astyqty ishki tutyný kólemi 1 shildege deiin (jańa marketing jylynyń basy) shamamen 5,8 mln tonnany, bidai 3,8 mln tonnany quraidy.
«Eksporttyq áleýet 3,1 mln tonna astyqty, onyń ishinde bidai 2,7 mln tonnany quraidy. Ótpeli qaldyq shamamen 1,3 mln tonnany qamtidy. Osylaisha, elde bar astyq kólemi halyqty qamtamasyz etý, tuqym men jemshóp qoryn qalyptastyrý úshin jetkilikti. Bul rette, Azyq-túlik kelisimshart korporatsiiasy 604 myń tonna astyq kóleminde azaimaityn qor qalyptastyrdy», - dedi Saparhan Omarov.
