Májilis depýtaty áskerge shaqyrylǵandardyń nesiesin ýaqytsha toqtatýdy usyndy, dep habarlaidy "Ult aqparat".
QR Parlamenti Májilisiniń Halyqaralyq ister, qorǵanys jáne qaýipsizdik komitetiniń múshesi Iýrii Timoshenkonyń aitýynsha, nesiesi bolǵandyqtan áskerge shaqyrylýshylar Otan aldyndaǵy boryshyn óteýden jaltaryp júr.
«Saldarynan sarbazdyń nesiesi onyń jaqyndaryna salmaq bolyp túsedi jáne sarbazdyń psihoemotsiialyq jai-kúiine yqpal etedi. Sondyqtan, áskeri qyzmet ýaqytynda nesie tólemin jáne ósimin ýaqytsha toqtatýdy usynamyz», - dedi depýtat QR Parlamenti Májilisi Halyqaralyq ister, qorǵanys jáne qaýipsizdik komitetiniń otyrysynda.
Qazirgi ýaqytta áskerdegi sarbazdardyń nesiesin ata-anasy tóleýge májbúr, tólenbegen jaǵdaida bank ósimpuly qosylyp jatyr.
«Úkimetke áskeri qyzmet kezinde nesieni ýaqytsha toqtatý týraly usynym jiberdik. Biznestiń bul usynysty qalai qabyldaitynyn bilmeimiz, biraq mundai qadamdy jasaý qajet», - dedi Iu. Timoshenko.
