Qorǵanys ministrliginiń saitynda Qazaqstan Respýblikasynyń azamattaryn áskeri qyzmetke shaqyrýdy uiymdastyrý jáne júrgizý qaǵidalaryna ózgerister men tolyqtyrýlar engiziletin Úkimet qaýlysynyń jobasy jariialandy, dep habarlaidy QazAqparat.
Qujat jobasynda budan bylai azamattardy áskeri qyzmetke shaqyrýdy keiinge qaldyrý jáne odan bosatý durystyǵy tekseriletini aitylǵan.
«Onyń ishinde beibit ýaqytta áskeri qyzmetke jaramsyz, soǵys ýaqytynda jaramdylyǵy shekteýli jáne áskeri esepten shyǵara otyryp, áskeri qyzmetke jaramsyz dep tanylǵan áskerge shaqyrylýshylardyń barlyq jeke isterine tekserý júrgizedi», - delingen zań jobasynda.
Merzimdi áskeri qyzmetke shaqyrýdy keiinge qaldyrýdy nemese odan bosatýdy usyný tártibi «Áskerge shaqyrýdy keiinge qaldyrýdy usyný» memlekettik qyzmet kórsetý erejesine jáne «Azamattardy áskeri qyzmetke shaqyrýdan bosatý» Memlekettik qyzmet kórsetý erejesine boynsha júzege asyrylatyny aitylǵan.
«Áskerge shaqyrylýshylar aýdandyq (qalalyq, oblystyq mańyzy bar qalanyń) áskerge shaqyrý komissiiasyna dálelsiz sebeptermen kelmegen, sondai-aq shaqyrý qaǵazyn azamattyń jeke ózine tapsyrý múmkin bolmaǵan barlyq jaǵdailar týraly qorǵanys isteri jónindegi basqarmalardyń (bólimderdiń) bastyqtary olardy izdestirý jáne áskerge shaqyrý pýnktine kelýin qamtamasyz etý úshin Qazaqstan Respýblikasynyń ishki ister organdaryna habarlaidy», - delingen qujatta.
Sondai-aq, zań jobasynda merzimdi áskeri qyzmetke shaqyrýdan jaltarǵan jáne áskerge shaqyrý kezeńinde meditsinalyq komissiialaryna kelmegen shaqyrylýshylardy izdestirý úshin Qazaqstan Respýblikasynyń ishki ister organdary birlesken qyzmet josparlaryn ázirlep, birlesken turaqty jumys isteitin toptar quratyny aitylǵan.
Ol úshin mynadai qujattama ázirlenedi:
1) ákimdiktiń «Áskeri esepke qoiýdan jáne áskeri qyzmetke shaqyrýdan jaltarǵan azamattardy izdestirýge bailanysty is-sharalar ótkizý týraly» qaýlysy (sheshimi);
2) qorǵanys isteri jónindegi basqarmalar (bólimder) men Qazaqstan Respýblikasynyń ishki ister organdary «Azamattardy áskeri qyzmetke shaqyrýdy qamtamasyz etý boiynsha sharalar týraly» birlesken buiryǵy, onymen birlesken izdestirý toptary qurylady;
3) alǵashqy áskeri esepke qoiýdan jáne áskeri qyzmetke shaqyrýdan jaltarǵan azamattardy týǵan jyly boiynsha esepke alý kitaby júrgiziledi.
Áskeri mindetti oryndaýdan jaltarǵan azamat retinde myna sanattaǵy adamdarǵa izdestirý júrgiziledi:
- qorǵanys isteri jónindegi basqarmalarǵa (bólimderge) alǵashqy áskeri esepke qoiýǵa bailanysty is-sharalarǵa kelýden jaltarǵandar;
- áskeri qyzmetke shaqyrýǵa bailanysty is-sharalarǵa kelýden jaltarǵandar;
- shaqyrý komissiiasyna kelýden jaltarǵandar;
- áskerge jóneltýge kelýden jaltarǵandar;
- meditsinalyq tekserýden ótýden jaltarǵandar;
- áskeri esepten shyǵarýsyz ketken jáne jańa turǵylyqty jeri boiynsha áskeri esepke ýaqtyly turmaǵan azamattar (uzaq izdestirýdegi azamattar).
