2024 jylǵy 26 aqpan men 11 naýryz aralyǵynda eGov mobile platformasynda azamattarǵa ulttyq kiim kiiýge qatysty saýalnama júrgizildi, dep habarlaidy "Ult aqparat".
Áleýmettanýlyq derekter kúndelikti ómirde ulttyq kiim kiiýdi maquldaýdyń joǵary deńgeiin kórsetedi.
Saýalnamaǵa qatysqandardyń 80,4%-y ulttyq elementteri bar kiimdi kún saiyn kiiýge oń kózqaraspen qaraidy. Bul degenimiz, ulttyq kiim qazirgi ómir jaǵdaiyna sai keledi jáne azamattar arasynda suranysqa ie.
Saýalnama nátijelerine sáikes, saýalnamaǵa qatysqandardyń árbir tórtinshisi (25,8%) kúndelikti ómirde ulttyq kiim kiedi.
Ulttyq kiim kiiýge degen oń kózqaras jastar arasynda baiqalady. Máselen, 18-29 jas aralyǵyndaǵy jastardyń 83,3%-y kúndelikti ómirde ulttyq kiim kiiýdi qolaily dep sanaidy.
Bul Qazaqstannyń qazirgi jastary óz halqynyń ulttyq salt-dástúrlerine, qundylyqtary men mádeni muralaryna kóbirek aralasyp jatqanyn kórsetedi. Ulttyq dástúrler men mádenietti ustaný Qazaqstandyqtardyń jas býyny arasynda tanymal trendke ainalýda.
Anyqtama: saýalnamaǵa elimizdiń barlyq óńirlerinen 104 842 adam qatysty. Onyń ishinde 56% áielder jáne 44% erler; 69% qala turǵyndary jáne 31% aýyl turǵyndary; 67% qazaqtar, 20% orys jáne 13% basqa etnostar; 30% (18-29 jastaǵylar), 52% (30-45 jastaǵylar), 15% (46-60 jastaǵylar), 3% (61 jáne odan joǵary jastaǵylar).
