Qazaqstanda álemdegi eń iri Alibaba elektrondy saýda kompaniiasynyń jelisi ashylýy múmkin. Bul jaiynda búgin QR Saýda jáne integratsiia ministri Baqyt Sultanov aitty, dep habarlaidy "Ult aqparat".
«Bizdiń ministrliktiń negizi baǵyttarynyń biri elektrondy saýdany damytý bolmaq. Bul baǵytta úlken jumys atqaryp jatyrmyz. Taiaýdaǵy Máskeýge saparym barysynda Reseidegi №1 jeli – Wildberries-pen kelisimge qol qoidyq. Olar bizge, Qazaqstanda elektrondy saýdany damytýǵa kómektesedi», - dedi ol vedomstvonyń Memleket basshysynyń taiaýdaǵy Joldaýynyń negizgi baǵyttaryn túsindirýge arnalǵan alqa otyrysynda.
Sonymen qatar ministr Memleket basshysy Qasym-Jomart Toqaevtyń 11-12 qyrkúiektegi Qytaiǵa sapary barysynda Alibaba júiesimen Tanysý josparlanyp otyrǵandyǵyn aitty.
«Memleket basshysynyń taiaý kúnderdegi Qytai halyq Respýblikasyna sapar aiasynda Alibaba júiesimen tanysý josparlanyp otyr. Yntymaqtastyq jáne osy jerde menshikti jelisin damytý, elektrondy saýda júiesinde otandyq taýarlardy ilgeriletý máselesin talqylaimyz», - dedi Baqyt Sultanov.
Sondai-aq, ministr Qazaqstanda eksporttaýshylardy qoldaýdyń jańa modeli ázirlenetinin aitty.
«Qazaqstandyq ónimdi ótkizý naryǵyn keńeitý úshin Ortalyq Aziia, Resei jáne Qytai naryqtary basym baǵyttar retinde aiqyndalǵan. Búgingi kúni «bir tereze» qaǵidaty arqyly eksporttaýshylardy qoldaýdyń jańa modeli engizilip jatyr. Bul rette biz kásipkerler palatasymen, holdingtermen, damý institýttarymen birge eksporttaýshylarymyzdy servistik qoldaýdyń jańa tásilderin jasaityn bolamyz. Qazirgi ýaqytta bul máseleniń ózektiligi óte aýqymdy. Eksporttaýshylar úshin «bir tereze» joq, keńinen qoldaýdan da ada», - dedi ol vedomstvonyń Memleket basshysynyń taiaýdaǵy Joldaýynyń negizgi baǵyttaryn túsindirýge arnalǵan alqa otyrysynda.
Sonymen qatar Baqyt Sultanov Eýraziialyq odaqtyń aiasynda ministrlik ózekti máseleler men strategiialyq baǵyttar ázirlep, EAEO-daǵy áriptes elderdiń naryqtarynda qazaqstandyq taýarlardy ilgeriletýge bóget jasaityn kedergilerdi joiý jumystaryn júrgizip jatqanyn aitty.
«Biz halyqaralyq arenada Dúniejúzilik saýda uiymynyń barlyq kelissózderine, sonyń ishinde Qazaqstan úshin keleshekte paidaly bolatyn baǵyttaryna belsendi qatysýǵa niettimiz», - dedi ol.
