Búgin Mańǵystaý oblysy ákimdigi men "Qazaqtelekom" AQ turǵyn úilerdiń qaýipsizdigi men jailylyǵyn qamtamasyz etýge arnalǵan innovatsiialyq ónim – "Aqyldy úidi" tanystyrdy, dep habarlaidy "Ult aqparat" oblys ákimdiginiń baspasóz qyzmetine silteme jasap.
Jańa servistiń tusaýkeserine Mańǵystaý oblysynyń ákimi Eraly Toǵjanov, "Qazaqtelekom" AQ basqarma tóraǵasy Qýanyshbek Esekeev qatysty. "Aqyldy úi" naqty ýaqyt rejiminde úide bolyp jatqan jaǵdailardy baqylaýǵa, oqys oqiǵalar týraly jedel aqparat alýǵa múmkindik beredi.
№35 úi Aqtaýdyń 15-shi yqshamaýdanynda ornalasqan. Bul kúzet jáne órt qaýipsizdiginiń intellektýaldy datchikteri iske qosylǵan Qazaqstandaǵy eń alǵashqy "Aqyldy úi" boldy.
"Aqyldy úidiń" júiesi symsyz beinekamera, qozǵalys, esiktiń ashylý datchikterinen turady. Detektorlar qozǵalysqa, esik nemese terezeniń ashylǵanyna, bir nárseniń janyp jatqanyna lezde áreket etedi, al beinekamera oqiǵany tirkep, fotoesep jiberedi. Úi iesi týyndaǵan qiyndyqtan smartfonǵa ornatylǵan mobildi qosymsha arqyly habardar bolady", — delingen habarlamada.
Baspasóz qyzmetinen habarlaǵandai, páter ielerine jabdyqty satyp alýdyń qajeti joq, ótinim boiynsha "Qazaqtelekom" AQ jabdyqty ózderi ákelip, ornatady, qurastyrý ýaqyty 40 minýttan aspaidy.
"Aqyldy úi" páterdiń keshendi qorǵalýyn qamtamasyz etýge múmkindik beredi. Turǵyndar qaskúnemderdiń úige kirýi nemese úi iesi joq kezde bolatyn apat týraly alańdamaityn bolady. Júie uialy telefonǵa habarlama jiberip, kez kelgen qiyndyq týraly lezde eskertedi, páterde naqty ne bolyp jatqanyn jáne kómek shaqyrýdyń qanshalyqty qajet ekendigin mobildi qosymsha arqyly kirip, kóre alady", — dep málimdedi baspasóz qyzmetindegiler.
Sondai-aq, 35-shi úidiń turǵyndary qazaqstandyqtar arasynda keńinen qoldanylatyn "Bultty beinebaqylaý" qyzmetine qosyla alady. "Bultty beinebaqylaý" qyzmeti abonentterge óz úiiniń janynda jáne podezde bolyp jatqan oqiǵalardy naqty ýaqyt rejiminde uialy qurylǵy nemese derbes kompiýterdiń kómegimen baqylaýǵa múmkindik beredi.
Kezdesý barysynda taǵy bir jańa ónim – "Aqyldy TKSh" qyzmeti tanystyryldy. Páterler men úilerge kún saiyn tutynylǵan sýdyń, gazdyń, elektr energiiasynyń nemese jylýdyń sany týraly resýrstyq kompaniiaǵa habar berip otyratyn "aqyldy" quralǵylar ornatylady.
