Qazaqstandaǵy sot sheshimi negizinde himiialyq kastratsiiany jasaýǵa bir ótinim kelip tústi. Bul týraly QR Densaýlyq saqtaý vitse-ministri Lázzat Aqtaeva málim etti, dep habarlaidy QazAqparat.
«2018 jyldyń 1 qańtarynan bastap Densaýlyq saqtaý ministrliginiń himiialyq kastratsiiany júrgizý jáne ony qoldaný erejeleri týraly buiryǵy kúshine endi. Sáikesinshe, sottyń sheshimi negizinde bul shara iske asyrylýy múmkin. Respýblikalyq biýdjetten tiisti qarajat qarastyrylǵan. Búginde sottyń sheshimi negizinde himiialyq kastratsiiany júrgizýge bir ótinim kelip tústi», - dedi vitse-ministr Úkimet Úiinde ótken baspasóz máslihatynda.
Sonymen qatar ol himiialyq kastratsiia jazasyn taǵaiyndaý rásimine toqtalyp ótti.
«Sot sheshiminen keiin, dárigerlik-konsýltativtik ári psihiatriialyq komissiianyń otyrysy ótedi. Tek osy sharalardan soń júzege asyrylady. Atap aitqanda, bul máselede sot sheshimi negizge alynady», - dep túsindirdi L. Aqtaeva.
Eske sala keteiik, 2018 jyldyń 1 qańtarynan bastap «Qazaqstan Respýblikasynyń keibir zańnamalyq aktilerine balanyń quqyqtaryn qorǵaý máseleleri boiynsha ózgerister men tolyqtyrýlar engizý týraly» zańy kúshine endi. Soǵan sáikes jyldyń basynda Bas prokýratýrada ótken jiynda himiialyq kastratsiialaýdy júrgizý máselesi qaralǵan bolatyn.
